Read Kalanga Njimbo 36 Bible Online

Njimbo 36 - Kalanga bible

Njimbo 36

¹Kutjuluka nlayo we Ndzimu kwe mbiimbi, kukati mukatikati kwe moyo wangu, mu nli kutja Ndzimu akupo.

²Ngoti unozwitjengedza mu nkumbulo eti, jinyo lile alingazibgwe likabengiwa.

³Matama e nlomo uwe i mbipo ne kutjebela, wakaletja kushinga nge butjenjedu nenge kuthama tjakalulwama.

⁴Unoluka maano mabiibi alilele mu ngubo dzidze, wakazwilonga mu zila isakalulwama, aatolambana ne bubi.

⁵Yahwe ludo gwenyu gusingazunguzike goandamila kudzimu, kugalikamoyo kwenyu koswika ku makole.

⁶Ndulamo yenyu inotungama se matombo e Ndzimu, kusumikilisa kwenyu konga gungwa gwakangina. Nthu ne phuka mozwitjidza imwi Yahwe.

⁷Ludo gwenyu gusingazunguzike gosheteka seni, Ndzimu. Bathu bose bangatizhila mu ntutshi we mapapilo enyu.

⁸Banoja thundu ye ng'umba yenyu nge bunji gwayo, mobang'wisa mu gwizi gwe kushatha kwenyu.

⁹Ngobe mu muli kodwilila butjilo; mu tjedza tjenyu tobona tjedza.

¹⁰Dwilidzani ludo gwenyu gusingazunguzike muna ibabo banomuziba. Ne jidzo lenyu ngalibe kuna ibabo bakatambunuka mu moyo!

¹¹Musiletjedze bathu basina mazwibhato bakanditshamba nge makumbo, kene kuli iko kutatiwa nge babi.

¹²Babi balele nge mitumbu; bakalashigwa pasi, abatotubula milika.