Read Kalanga Njimbo 37 Bible Online

Njimbo 37 - Kalanga bible

Njimbo 37

¹Usizwidziyidze ngekwe bathu babi, usitongo dwila moyo bashingi be mbipo.

²Ngekuti banowobuna se bushwa, bebe bewoma se mitinyana minyolo.

³Galabgwe muna Yahwe, ushinge ndulamo kuti ndizo ugale mu shango ushathile kugadzikana.

⁴Shatha muna Yahwe, ngono banowokupa yemula dze moyo uwo.

⁵Biga butjilo gugo muna Yahwe, galabgwe mubali ngono ibo banowoshinga.

⁶Banowodusila ndulamo iyo patjena se tjedza ne ndulamo iyo se masikati makulu.

⁷Dzikama mbeli kwa Yahwe, ubalindile nge moyo nlefu. Usizwidziyidze ngekwe unodwilila mu zila iye, kene iye unoluka mano akabipa.

⁸Uzwidzibe mu kugwadzamoyo, ne mu bushongola, goyisa mu mbipo koga.

⁹Ngoti babi banolobesiwa, koga ibabo banolindila Yahwe banothuwa shango.

¹⁰Kowobe tjibakana koga, babi banowobe basitjipo. Kene ukalingisisa pa magalo awe, unowobe asipo ipapo.

¹¹Koga bana moyo nnyolo banowothuwa shango, ngono banowoshatha mu kubhudilila kwakawanda.

¹²Mbi unolukila mano nlulwami, enlinga nge lubengo.

¹³Koga Yahwe banoseka mbi, ngono banobona kuti zhuba lile laswika.

¹⁴Babi banoshomola mathumo abo bakapeta matati abo, kutemela pasi ibabo banosheta, kubulaya ibabo bakatambunuka.

¹⁵Mathumo abo anowobhaya mimoyo yabo, matati abo anowovunika.

¹⁶Kushomanana nlulwami kwaanako koyita pa fumwa njinji ye babi.

¹⁷Maboko e babi anowovung'wa, koga Yahwe banowosimisa bakalulwama.

¹⁸Yahwe banoziba mazhuba e basina nlandu, ne lukata gwabo gowogala nge kusingapele.

¹⁹Abangabhakhwe nge shoni mu misi yakabipa, mu mazhuba e bhamba bana zwakalizana.

²⁰Koga babi banowoloba, zwita zwa Yahwe zofanana ne bubuya gwe shango, zowopela se busi.

²¹Mbi unoadzima ngono kasibgwilize tjaanokolota, koga nlulwami aatonyimana, unopana.

²²Ibabo bakakombolegwa ndi Yahwe banowothuwa shango, koga babakalonga bhiso banowothubugwa.

²³Thambo dze nthu dzodwa muna Yahwe, koga banosimisa banobashathisa.

²⁴Kene awa aatoti kakandalalila tjose, ngoti Yahwe bakabhata luboko gugwe.

²⁵Ndakabe ndili ntukununu, ngono ngwenu ndakwegula. Koga andithu abona nlulwami elashiwa kene bana babe bekumbila zojiwa.

²⁶Unopana tjibaka tjose kaadzimana, ne bana babe banobe gombolelo.

²⁷Siya mbipo, ushinge ndulamo, ndizo unowogala nge kusingapele.

²⁸Ngoti Yahwe banoda ndulamo, abangasiye balulwami babo. Balulwami banowotjengetiwa nge kusingapele, koga bana be babi banowothubugwa.

²⁹Balulwami banowothuwa shango bakagala muili nge kusingapele.

³⁰Nlomo we nlulwami unoleba butjenjedu ne lulimi gugwe goleba ndulamo.

³¹Nlayo we Ndzimu umu moyo uwe, aatodzembeleka.

³²Mbimbi unolalila nlulwami, eshaka kumbulaya.

³³Koga Yahwe abanganletjedzele mu simba lile, kene kuli kunletja etilikwa nlandu ha esumikilisiwa.

³⁴Milila Yahwe ulondolodze zila yabo, ibo banowokukudza ukathuwa shango, unowobona kulobesiwa kwe babi.

³⁵Ndakabona nthu wakabipa akapasula se nti we nsida we Lebanoni.

³⁶Ndakapinda ipapo kakale ngono kabe asitjipo, nenguba ndakanshaka kwakabe kusina paangawang'wa.

³⁷Linga nthu usina nlandu, ubone nthu wakatambunuka, ngoti una bumangwana.

³⁸Koga batjuluki be nlayo banowolobesiwa tjose, ludzi gwabo gowobulawa.

³⁹Jidzo le nlulwami lodwa kuna Yahwe, ndibo dizhilo lile mu nsi we kudziyidzika.

⁴⁰Yahwe banobabhatsha bakabaangula, banobaangula mu babi, ngekuti banotizhila ku bali.