Read Kalanga Njimbo 38 Bible Online

Njimbo 38 - Kalanga bible

Njimbo 38

¹Yahwe, musinditjemele makagwadzamoyo, kene kundilaya nge bushongola.

²Misebe yenyu yakadzikila mundili, ne tjiazha tjenyu tjandikatsha.

³Akutjina mamuko mu mbili wangu, nge kugwadzamoyo kwenyu, akutjina mamuko mu mafupa angu nge tjibi tjangu.

⁴Ngobe tjibi tjangu tjakandipinda, tjotjinga ntolo unondilemela.

⁵Mbonje dzangu dzonyikishila kakale dzonuhwa nge bulengwe gwangu.

⁶Ndakagogonyala ndakagoba, zhuba lose, ndoyendayenda ndilila.

⁷Mbili wangu unopisa, akuna kuzwihwa mu mbili wangu.

⁸Anditjina gwangu ndapelegwa, ndogomela nge kuhwazogwadza kwe moyo wangu.

⁹She, zose zwandakashuba mozwiziba, kugomela kwangu akuzosumbikala kumuli.

¹⁰Moyo wangu unoloba, matatabuko angu anopela, ne mesho angu aatjabona.

¹¹Bazwalani bangu ne bakwinya bangu bamilile kulekule nge mbonje dzangu, ne makamu angu amile kutjena nami.

¹²Ibabo banovima butjilo gwangu bakanditeya; ibabo banoshaka kundihwisa zogwadza banoleba ngekwe kundikubadza, banolangana bupitipiti zhuba lose.

¹³Koga ndonga bhubuzebe, anditohwa, ndonga mbebebe isingalebeleke.

¹⁴Ee, ndonga nthu usingahwe, ne nlomo uwe usingalebeleke.

¹⁵Koga ndimilile imwi Yahwe, ndimwi Yahwe Ndzimu wangu munowodabila.

¹⁶Ndotembezela nditi, “Tjikulu musiletje bakashatha nge kwangu, ibabo banondikuwelela ha ndisodzoloka!”

¹⁷Ndabepejo ngowa, gwadziwa akutopela mundili.

¹⁸Ndozwileba jinyo langu; ndohwisiwa zogwadza nge tjibi tjangu.

¹⁹Babengi bangu imi ndisina nlandu nabo bakasima, banjinji banondibenga kusi nge fanilo.

²⁰Ibabo banobgwilizila ndulamo nge bubi banonditjinya zina ngoti ndoshinga ndulamo.

²¹Musindilashe Yahwe. Ndzimu wangu, musibekule nami.

²²Libilidzilani kundibhatsha, imwi She jidzo langu.