Read Kalanga Njimbo 40 Bible Online

Njimbo 40 - Kalanga bible

Njimbo 40

¹Ndakalindila Yahwe nge moyo nlefu, bakanditeedza bakahwa tjililo tjangu.

²Bakandidusa mu gomba lina mbatsha, bakandidusa mu dope. Bakandimisa pezhugwi kwe shongwe, besimisa thambo dzangu.

³Bakalonga lumbo lutshwa mu nlomo wangu, lumbo gwe gudzo ku Ndzimu wedu. Banji banowobona bakatja, ndizo banowogalabgwe Yahwe.

⁴Wakakombolegwa nthu unogalabgwe muna Yahwe. Usingayende kuna banozwikudza, kuna ibabo banolashika betobela midzimu ye manyepkhwa.

⁵Yahwe Ndzimu wangu, makashinga mishingo yenyu inotjenamisa ne njalakang'wa dzenyu nge kwedu, akuna mmwe unonga imwi. Ha ndabe ndingaleba nge kwazo, ate zwingabalika nge bunji.

⁶Zwibhayilo ne zwipo ate izo zwamunoyemula, koga tjamakandipa i zebe inohwa. Zwipo zwinopisiwa ne zwipo zwinodusigwa tjibi, amuzotongozwishaka.

⁷Ndizo ndakati, “Bonani, ndozha; mu lukwalo kwakakwagwa nge kwangu.

⁸Ndoshathila kuthama kuda kwenyu, Ndzimu wangu nlayo wenyu umu moyo wangu.”

⁹Ndakaleba ndebo mbuya ye kutjidziwa mu gubungano gulu. Sekwa munoziba andizozhalila nlomo wangu anyalala Yahwe.

¹⁰Andizosumbika bhatsho yenyu inotjidza mukati kwe moyo wangu. Ndakaleba ngekwe kugalikabgwe kwenyu nenge jidzo lenyu. Andizosumbika ludo gwenyu gusingazunguzike nenge kugalikabgwe kwenyu mu gubungano gulu.

¹¹Musindishayile ngoni Yahwe, ludo gwenyu ngusingazunguzike ne kugalikabgwe kunditjengete nge kusingapele.

¹²Zwibiibi zwisina mbalo zwakandipoteleka. Zwibi zwangu zwakandikulila kuswikila ndisingatjabone. Zopinda mavudzi e nsholo wangu, moyo wangu wandipedza masimba.

¹³Shathisiwani nge kunditjidza Yahwe. Yahwe libilidzani kundibhatsha.

¹⁴Bose banoshaka kundibulaya ngababhatisiwe shoni bahwumanyiwe. Ngababgwiliziwe shule basilumbidziwe ibabo banoshaka kundikubadza.

¹⁵Ngabakaabadziwe ngobhatisiwa shoni kwabo ibabo banoti kundili, “Ehe, Ehe!”

¹⁶Koga bose banomushaka ngabapululudze bashathe mu muli. Bose banoda jidzo lenyu ngabagale beti, “Ku nkulu Yahwe!”

¹⁷Koga imi nge kwangu ndi nshayi ndosheta, koga Yahwe banokumbula nge kwangu. Ndimwi bhatsho ne nsununguli wangu, musinonoke Ndzimu wangu.