Read Kalanga Njimbo 41 Bible Online

Njimbo 41 - Kalanga bible

Njimbo 41

¹Iye unokumbula bashayi wakakombolegwa, Yahwe banonsunungula mu nsi we mbatsha.

²Yahwe banontjengeta bakantjidza. Unodang'wa wakakombolegwa. Amutonletjedzela kuda kwe zwita zwizwe.

³Yahwe banonsimisa ha ali mu thobo dzinopisa. Mompodza mu kugwala kukwe mukansimisa.

⁴Nge kwangu imi ndakati, “Yahwe, mundihwile ngoni mundipodze, ngoti ndakamutjinyila.”

⁵Zwita zwangu nge yemula mbiimbi zoti nge kwangu, “Unowofa lini zina lile likatongokanganika?”

⁶Koga ha mmwe ezha kuwondibona, unoleba matama asina tjaanodwa, mu moyo uwe ekubunganya zwakabipa. Ha ebhudila kuzhe unozwiandamisa.

⁷Bose bakandibenga banondiseba, banokumbula kuti ndowowigwa ne zwakabipisisa.

⁸Beti tjithu tjinobulaya tjakandinamatila, aatjowomuka kakale paalele.

⁹Naiye nzwalani wangu nkulu wandakabe ndigalabgwe munli, iye watakabe tija tjiwunga tjangu tose, wakatjindishandukila.

¹⁰Koga imwi, Yahwe, ibeni ne ngoni nami mundimilidze kuti ndibabgwilizile.

¹¹Ndiyeyo zila ndowoziba kuti moshathiswa ndimi, ngoti tjita tjangu atjizondikunda.

¹²Koga makandisimisa nge zila yekutambunuka kwangu, mukandigadza pa muli nge kusingapele.

¹³Ngabakudziwe Yahwe Ndzimu we Iziraela, kudwa ntolo kunoti ne kusingapele kose. Ngakujalo Ngakujalo.