Read Kalanga Njimbo 42 Bible Online

Njimbo 42 - Kalanga bible

Njimbo 42

¹Ndzimu, ndakamushuba se bhizha lishuba vula dzinowunga.

²Meya yangu ina nyota ye Ndzimu. Ndowodza abona buso gwe Ndzimu lini?

³Mishodzi yangu yatjibe zojiwa zwangu siku ne sikati, ha bathu ibo bedwilila beti kundili, “Ungayi Ndzimu uwo?”

⁴Zwithu izwezwi ndozwikumbula andidusa tjinogwadza meya yangu: Sekwa ndakayenda ne bunji, ndakagutungamila takalongolokela ku ng'umba ye Ndzimu, timimila nge kushatha nenge njimbo dzinoboka, mbunga uli mu nzano.

⁵Ini uli mu buyendasi iwe meya yangu, ini wakanyalala mukati kwangu? Galabgwe mu Ndzimu ngoti ndowowukudza kakale, iwo bhatsho yangu ne Ndzimu wangu.

⁶Meya yangu imu buyendasi mukati kwangu, ndizo ndomukumbula ndili mu shango ye Jorodani neye Hemoni, kudwa ku Dombo le Miza.

⁷Misundila inodana misundila mu nsindo we mabilila enyu. Matuthu ne mabundo e vula yenyu akandifukidza.

⁸Masikati Yahwe banolakidza ludo gwabo gusingazunguzike, mu busiku ndomba lumbo gwabo, ntembezelo ku Ndzimu we butjilo gwangu.

⁹Ndodwa Ndzimu shongwe yangu nditi, “Ini makandikangang'wa? Ini ndakafanila yendayenda nge kuhwazogwadza ndakatshambilidziwa nge tjita?”

¹⁰Ndonga ndina banga gulu mu mbili wangu, banyanyayidzi bangu banondisapula, bedwilila beti, “Ungayi Ndzimu uwo?”

¹¹Ini uli mu buyendasi meya yangu, ini ulinyelele mukati kwangu? Galabgwe mu Ndzimu, ngobe ndowoti kakale awukudza, mbhatshi wangu, Ndzimu wangu.