Read Kalanga Njimbo 44 Bible Online

Njimbo 44 - Kalanga bible

Njimbo 44

¹Takahwa nge dzedu zebe, Ndzimu, bobatategulu bedu bakatibudza, mishingo yamakashinga mu misi yabo, mu mazhuba a ntolo.

²Imwi nge maboko enyu makatata tjaba, koga ibo mukabadzikila, makadziyidza njudzi, koga ibo mukabasunungula.

³Abazotapa shango nge mathumo abo ne tjiazha tjabo atjizobapa kukunda koga nge tjiazha tjenyu tje luji ne luboko gwenyu ne tjedza tje buso gwenyu, ngoti makabashathila.

⁴Imwi mu mambo wangu ne Ndzimu wangu, ndimwi munolaula kuti Jakubo akunde.

⁵Nge simba lenyu toligila pasi zwita zwedu, nge zina lenyu totshambila pasi banogwa naswi.

⁶Ngoti anditogalabgwe mu dati langu, kene thumo langu alinganditjidze.

⁷Koga makatigwila mu zwita zwedu, mukashanganya misholo ye banotibenga.

⁸Todwilila tizwikudza mu Ndzimu, kakale towoboka zina lenyu nge kusingapele.

⁹Koga makatilasha mukatiyisa pasi, amuzoyenda ne babhayani bedu.

¹⁰Makathama kuti titizhe zwita zwedu, zwita zwedu zwakatapa thundu dzedu.

¹¹Makatithama tikanga pkhwizi dzinobhayiwa, mukatipaladza nge zwitjaba.

¹²Makatengesa bathu benyu nge themba isi ye tjimwe, kusina tjinomubuyila mu thengeso yabo.

¹³Makatithama sapa le babakidzani bedu, todadigwa ndi ibabo bakatipoteleka.

¹⁴Makatithama tikabe sumo mu zwitjaba, tabe iseko pakati kwe bathu.

¹⁵Zhuba lose ndolengudzika, ne shoni dzandikombola,

¹⁶ngekwe matama e batukani ne badadili, nge kubona tjita ne mbuzuludzi.

¹⁷Kose ikoku kwakadelukila mutili, nenguba tisakamukangang'wa, kene kuli kushandukila tjidumano tjenyu.

¹⁸Mimoyo yedu ayizoshandukila shule, ne makumbo edu aazobhuda mu zila yenyu,

¹⁹kwamungabe makativunilila mu tjimo tje phungubgwe, makatifukidza nge zhalima gulu.

²⁰Ha tabe takakangang'wa zina le Ndzimu, kene takanamata ndzimu upoga.

²¹Apa Ndzimu wabe usingake ukaziba ikoku kene? Ngobe unoziba zwikohwa zwe moyo.

²²Tobulawa zhuba lose nge kwenyu, tonga pkhwizi dzinobhayiwa.

²³Muzwimuse! Mulelileni, She? Mukani, musitilashile tjose!

²⁴Ini musumbika buso gwenyu? Ini mukangang'wa dziyidzika kwedu ne kutshambilidzwa kwedu?

²⁵Tatjibhubama mu hwuluba, mibili yedu yakakokomela pasi

²⁶Milikani muzhe kuwotibhatsha, mutitjidze, muthamila ludo gwenyu gusingazunguzike.