Read Kalanga Njimbo 45 Bible Online

Njimbo 45 - Kalanga bible

Njimbo 45

¹Moyo wangu unotebukana nge matama akanaka. Matama angu ndakaalingisa kuna mambo. Lulimi gwangu gonga pensele yakalulwamisigwa kukwala.

²Iwe wakanaka kupinda balume bose, milomo iyo izhele ludo. Ndizo Ndzimu wakakukombolela nge kusingapele.

³Dedelani thumo lenyu imwi muna masimba, ndumbidzo nge yenyu ne buzinda.

⁴Mu buzinda gwenyu kundilani malebeswa kubakilila ndulamo. Luboko gwenyu gwe luji ngagumudiye mishingo inotjisa.

⁵Misebe yenyu inopitsha inobhaya mimoyo ye zwita zwa mambo. Bathu banowila kusi kwenyu.

⁶Tjigalo tjenyu tje bushe tjigelile tjose. Ludozo gwenyu gwe bushe ludozo gwe ndulamo.

⁷Moda ndulamo mukabenga bubi. Ndizo Ndzimu, iwo Ndzimu wenyu, wakamupa tjibombo pezhugwi kwe balizani namwi nge kumuzhodza mafuta e kushatha.

⁸Hazu dzenyu dzonuhwilila mira ne gonde ne khasiya. Mu mbako dze bushe dzakabakwa nge nyanga dze zhowu kolila zwilidzo zwe misungo zwinomushathisa.

⁹Bakololokadzi ba bomambo bapakati kwe bakadzi banolumbidziwa, ku luboko gugo gwe luji kumile Nfumakadzi akaambala golide ye Ofi.

¹⁰Ihwa, iwe nkololokadzi, kumbula uzhule zebe, kangang'wa bakanyi kwenyu ne be nsha wa tate babo.

¹¹Mambo banowoshathisiwa nge bubuya gugo. Se bali she uwo, ubatete.

¹²Bathu be Tire banowoshaka ludo gugo nge zwipo, bafumi kupindisa.

¹³Fumwa dzose ngosiyana kwadzo. Nkololokadzi wa mambo umu ng'umba iye akaambala hazu dzakalukiwa nge golide.

¹⁴Unowotungamiligwa kuna mambo akaambala hazu dzina mibalabala, epelekwa nge baanadi. Na ibobo banowozhisiwa kumuli.

¹⁵Banopululudza bakashatha bakatungamigwa bengina mu ng'umba ye bushe ya mambo.

¹⁶Mu bumo gwa bobatategulu benyu kowobe ne bakololo benyu, mowobathama bakabe boshe mu shango.

¹⁷Ndowothama kuti zina lenyu likudziwe mu zwizekugwana zose. Ndizo njudzi dzowomukudza nge kusingapele.