Read Kalanga Njimbo 48 Bible Online

Njimbo 48 - Kalanga bible

Njimbo 48

¹Yahwe bankulukulu kakale bakafanila kudziwa kukulukulu mu nzi nkulu we Ndzimu wedu. Dombo labo lakayengemala,

²lakanaka nge bulefu gwalo, ndilo shatho ye shango yose, Dombo le Ziyoni, kulekule ku bunandzwa, iwo nzi nkulu wa mambo.

³Mu matizhilo e nzi nkulu Ndzimu wakazwilakidza uli iwo bhakasa lakasima,

⁴Ndizo bomambo bakakubungana, bakashangana bose.

⁵Bakati tjinyolotjo bebona ikoku bakatjenama kukulu; bakalobgwa nge hana, bakatola makumbo bakatizha

⁶Ipapo kutetema kukabe mubali, bakabe nge zwibhayo zwinonga zwe nkadzi unotshibama,

⁷Se phepo inodwa ku bhezhuba ipkhwanya zwikepe zwe Tashishi.

⁸Sekwa takati tikahwa, ngwenu tatjizwibonegwa mu nzi nkulu wa Yahwe we mibunga, muna iwo wakabambiwa nge Ndzimu nge kusingapele kose. Wakabambiwa nge Ndzimu ukagalila tjose nge kusingapele kose.

⁹Tokanuka ludo gwenyu gusingazunguzike Ndzimu, pakati pe ng'umba yenyu.

¹⁰Zina lenyu, koga sekudziwa kwenyu, nailo loswika ku phelelo dze shango. Luboko gwenyu gwe luji gokunda kwazo.

¹¹Dombo le Ziyoni ngalishathe, mizi ye Juda ngayishathe nge zila yekusumikilisa kwenyu.

¹²Yenda mu nzi we Ziyoni, uwupoteleke, bala thungamakole dzawo.

¹³Alakana kwazo makuma akabakilila nzi nkulu iwoyo ne matizhilo awo kuti ndizo ubudze tjizekugwana tjinowozha.

¹⁴Kuti iwoyu Ndzimu, Ndzimu wedu nge kusingapele kose, unowobe ntungamili wedu nge kusingapele kose!