Read Kalanga Njimbo 49 Bible Online

Njimbo 49 - Kalanga bible

Njimbo 49

¹Ihwani woku imwi bathu bose; teedzani imwi bagali be shango yose,

²bapasi kose ne bakamilidzika, bafumi kose ne bashayi.

³Nlomo wangu unowoleba butjenjedu; ndebeleko ye moyo wangu inowobe kuhwisisa.

⁴Ndowoteedza makungulupeswa; ndowolidza dende awana dabilo ye malipa.

⁵Ini nditja mu misi ye kudziyidzika, ha matjinyo aibabo banobhayana nami akandipoteleka,

⁶ibabo banogalamoyo mu fumwa dzabo kakale bezwikudza ngekwe bunji gwe thundu dzabo?

⁷Malebeswa, akuna nthu tjaangatenganya butjilo nditjo, akuna themba nthu yaangabigila Ndzimu nge kwago.

⁸Tjinotenganya butjilo themba yatjo i pezhugwi kwazo, kakale akungashingikale

⁹kuti nthu atjilile tjose, asitongongina mu gomba.

¹⁰Ngobe atilinga batjenjedu, towana befa; tjilengwe ne tjihema banoloba bose besiyila bamwe fumwa yabo.

¹¹Zwikumbu ndizo mizi yabo nge kusingapele, ndiwo magalo abo ne zwizekugwana zose, nenguba bakatumila shango nge mazina abo.

¹²Koga nthu angagalile tjose mu kuzwikudza kukwe unonga phuka dzinoloba.

¹³Elo ndilo bhelelo le zila ye bulengwe, bhelelo la ibabo banoshathisiwa nge thundu dzabo.

¹⁴Se pkhwizi, bakashaligwa gomba le lufu; lufu gowobe nlisi wabo; banodelukila koga mu ikumbu, ne mbumbiko yabo inowokolomoka; Gomba le lufu ndilo linowobe nzi wabo.

¹⁵Koga Ndzimu unowodzutunula meya yangu mu simba le lufu, ngobe iwo unowondiamutjila.

¹⁶Musitje ha bamwe befuma, ha fumwa dze mizi yabo dzipaphidzika.

¹⁷Ngobe ha befa akuna tjabanowosenga, fumwa yabo ayitowobatobela.

¹⁸Nenguba mu butjilo gwabo bakabe bezwidwa beti bakashatha, ngoti nthu unokudziwa ha wuzwithamila kwakanaka,

¹⁹banowoyenda kuna bobatategulu babo, ibabo basingatjawobona tjedza kakale.

²⁰Koga nthu angagalile tjose mu kuzwikudza kukwe; unonga phuka dzinoloba.