Read Kalanga Njimbo 5 Bible Online

Njimbo 5 - Kalanga bible

Njimbo 5

¹Bhulutanani mahwi angu Yahwe, muhweni tjililo tjangu.

²Hwililani tjililo tjangu, mambo wangu, kakale muli Ndzimu wangu, ngobe ndolingisa mitembezelo yangu kumuli.

³Yahwe, mangwanana mohwa hwi langu, mu mangwanana ndoyisa mitembezelo[1] yangu ku muli, ngono ndibe ndilindila.

⁴Amute muli Ndzimu unoda mbipo; bubi agungagale namwi.

⁵Banozwikudza habangame pa mesho enyu. Mobenga babi bose.

⁶Molobesa ibabo banonyepa Yahwe banoshima bathu banotebula lopa ne banotjebela.

⁷Koga imi nge ludo gwenyu bukulu, ndowongina mu ng'umba yenyu, ndowonamata ndimuteta ndakalinga ku ng'umba yenyu,

⁸Yahwe, munditungamile mu ndulamo yenyu, ngekwe zwita zwangu. Tambunudzani zila yenyu mbeli kwangu.

⁹Ngobe akuna lebeswa linodwa mu milomo yabo, mimoyo yabo igolomodzo. Hwulo dzabo zwikumbu zwakaashama, banotjebela nge ndimi dzabo.

¹⁰Thamani kuti basengane ne matjinyo abo Ndzimu. Ngabaligwe nge milangano yabo, mubatatile kutjena ngekwe matjinyo abo manji, ngoti bakamupandukila.

¹¹Koga bose banotizhila ku muli ngababe ne kushatha, ngabambe misi yose nge kushatha. Mutalabudze mbakililo yenyu mubali, kuti ndizo ibabo banoda zina lenyu bakudziwe mu muli.

¹²Ngoti mokombolela balulwami Yahwe; mobavikila se tjivikili.