Read Kalanga Njimbo 50 Bible Online

Njimbo 50 - Kalanga bible

Njimbo 50

¹Ibo nkulukulu, Ndzimu Yahwe, banolebeleka kakale banodana shango kudwa mu kubhuda kwe zhuba kunoti kungina kwalo.

²Kudwa mu Ziyoni, igo bubuya nge kwago, Ndzimu unopenyelela.

³Ndzimu wedu unozha kakale awutonyalala koga wakatungamidza moto unonyeledza, ne vula inona nge dutu yakabapoteleka.

⁴Unodana kudzimu, kadana mu shango kuti ndizo usumikilise bathu bawo;

⁵“Mundikubunganyile bagalimoyo, ibabo bakathama tjidumano nami nge kudusa tjibhayilo!”

⁶Kudzimu koleba ngekwe bululwami gwawo, ngobe Ndzimu ngekwawo nsumikilisi.

⁷“Hwililani, bathu bangu, ngono ndowolebeleka, iwe Iziraela ndowotendeka ngekwe bubi gugo. Ndimi Ndzimu, Ndzimu uwo.

⁸Anditokutjemelela zwibhayilo zwizo; zwibhayilo zwizo zwakapisiwa zwipa mesho angu tjibaka nge tjibaka.

⁹Anditowoamutjila nkono unodwa ku nzi uwo kene dzili mbudzi mu danga lilo.

¹⁰Ngobe phuka imwe ne imwe ye shango nge yangu na idzo ng'ombe dzimu matombo ali tjiwulu.

¹¹Ndoziba nyuni dzose mu shango, ne tjimwe ne tjimwe tjinoyenda mu shango nge tjangu.

¹²“Ha ndabe ndina zhala, ndabe ndisingawomubudza, ngobe shango na kose kumu ili nge kwangu.

¹³Apa ndoja nyama ye mikono kene, na iwo malopa e mbudzi apa ndoang'wa kene?

¹⁴Ipa Ndzimu tjipo tje kuboka, ulipe tuna kuko kuna iye Upezhugwi zhugwi.

¹⁵Undidane mu nsi wekudziyidzika; ndowokutjidza, ngono unowondikudza.”

¹⁶Koga ku babi Ndzimu ukati, “Unotola ngayi kuleba ndaulo dzangu kene kuli kuleba ngekwe tjidumano tjangu nge nlomo uwo?”

¹⁷Unobenga tjemegwa, kakale unoposela matama angu kutjena nawe.

¹⁸Ha ubona mbava unozwihwananya nayo, kakale unogala ntutshi ne phombgwe.

¹⁹“Unoletjedza nlomo uwo ukalaugwa nge bubi, ne lulimi gugo goleba bupitipiti.

²⁰Unogala pasi ukaleba kusakalulwama ngekwe wakanyi kuko. Unobulaya mwana wa mmeyabo.

²¹Zwithu izwezwi wakazwithama ngono ndagala ndilinyelele; wakabe ukumbula kuti ndimmwebo unofanana nawe. Koga ngwenu ndokutjemela ndakasimisila kakale ndikutilika nlandu.

²²“Zibani woku, imwi munokangang'wa Ndzimu, kusijalo ndowomupalula na pakati, ngono akuna unowomutjidza.

²³Ibabo banozhisa zwibhayilo zwe kuboka banondikudza; kuna ibabo banoyenda mu zila ye malebeswa, ndowobalakidza jidzo le Ndzimu.”