Read Kalanga Njimbo 51 Bible Online

Njimbo 51 - Kalanga bible

Njimbo 51

¹Ibeni ne ngoni mundili, Ndzimu, kuyendidzana nge ludo gwenyu gusingazunguzike; bukushani matjinyo angu kuyendidzana ne ngoni dzenyu.

²Sukani milandu yangu kwazo, kakale musuke tjibi tjangu.

³Ngobe ndoziba milandu yangu, ne tjibi tjangu tji mbeli kwangu misi yose.

⁴Ndakatjinyidzila imwi koga, ndikathama tjakabipa mu mesho enyu, kuti ndizo shamu yamunoloba bathu benyu ibe mu malebeswa ne ngekuti mushayiwe nlandu ha mupedza ndebo.

⁵Malebeswa hwuti ndakazwagwa ndina jinyo, ndakabe ntjinyi mme yangu betola ntumbu.

⁶Moshaka lebeswa mukatikati kwe nthu; ndizo mundidiye butjenjedu mu moyo wangu.

⁷Mundisuke nge hosapu ndizo ndowobe mbuyanana; mundisuke, ndizo ndowobe ntjena kupinda kapuku.

⁸Thamani kuti ndihwe mpululu ne shatho; thamani kuti mafupa amakapkhwanya ashathe.

⁹Zwimbani mesho enyu kuti musibone zwibi zwangu, kakale mubukushe milandu yangu yose.

¹⁰Bumbani mundili moyo mbuyanana, Ndzimu, kakale mulonge meya tshwa yakalulwama mukati kwangu.

¹¹Musinditatile kutjena namwi, kakale mosinditolele Meya yenyu yakayengemala.

¹²Mundibgwilizile shatho ye jidzo lenyu, kakale musimise mukati kwangu meya inoshaka ndulamo.

¹³Ndizo ndowodiya batjinyi zila dzenyu, ngono batjinyi banowoshandukila kumuli.

¹⁴Munditjidze mukutebula lopa, Ndzimu, imwi Ndzimu we jidzo langu, ngono lulimi gwangu gowombila pezhugwi ngekwe jidzo lenyu.

¹⁵She, mumunulani nlomo wangu, ndizo ndowomukudza ndiwo.

¹⁶Amutoda zwibhayilo; Ha ndabe ndingadusa zwipo zwakapisiwa, amungazwishathile.

¹⁷Tjibhayilo tjinoamutjilika ku Ndzimu, i meya yakahwa zogwadza; moyo umukuhwa zogwadza amungaulingile pasi.

¹⁸Thamilani Ziyoni kwakalulwama mu kushatha kwenyu; bakani kakale makuma e Jerusalema,

¹⁹ndizo mowoshathisiwa nge zwibhayilo zwakapelela zwakapisiwa; ndizo mikono inowobhayigwa mu zwibeso zwenyu.