Read Kalanga Njimbo 55 Bible Online

Njimbo 55 - Kalanga bible

Njimbo 55

¹Teedzani ntembezelo wangu, Ndzimu; musizwisumbikile kukumbila kwangu.

²Mundibhatshe mundidabile; ndodziyidzika mu kung'ong'ola kwangu. Nsholo wangu wakashangashangana koga,

³ngekwe zhoba ye tjita, kakale ngekwe zhoba ye babi. Banondisimisila butjilo, banoshathisiwa nge kundigwadzila moyo.

⁴Moyo wangu unogwadziwa kukulu, lufu ne tjisa kwago zwimundili.

⁵Lutjo ne tetema kwabe mundili, ne kutjisa kunopalusa moyo kumundili.

⁶Ndozwidwa nditi, “Ha ndabe ndina mapapilo se njiba! Ndabe ndowowuluka, ayenda zwangu anonyaluluka;

⁷Nge malebeswa, ndabe ndowotizhila kulekule; ndabe ndowogala mu tjilambanyika;

⁸Ndabe ndowolibilidzila kuzwiwanila bugalo gwandinowotizhila phepo ne matutu muguli.”

⁹She, shangashanganyani ndebo dzabo mudzizhadze bulengwe; ngoti ndobona bugebeng'a ne kukwebakwebana mu nzi nkulu.

¹⁰Siku ne sikati banopoteleka liswingo gwakabakilila nzi nkulu, butjinyi ne kudziyidzika zwimukati kwawo;

¹¹Kolomoka kwabe pakati kwawo; matengeselo awo azhele tshambilidzo ne bupitipiti.

¹²Ate zwita zwinondidadila, ngobe ndabe ndingadzikitadza; ate babhayani nami banondishayila buthu, ngobe ndabe ndowobagwatila.

¹³Koga ndiwe, nkwinya wangu, iwe wandinogala ntutshi nawe, nzwalani wangu wandakawolobela,

¹⁴ibabo bandakabe ndibe nabo nge zila yakanaka; takayenda mu Ng'umba ye Ndzimu ne mbunga.

¹⁵Ngabazhigwe nge lufu; ngabayende be tjila ku bugalo gwe bafi; ngobe bubi gumu mizi yabo nenge mu mimoyo yabo.

¹⁶Koga imi ndodana Ndzimu, ngono Yahwe banowonditjidza.

¹⁷Madekwana ne mangwanana nenge masikati ndoleba ng'ong'olo yangu kakale ndigomela, koga She banowohwa hwi langu.

¹⁸Banowondidzutunula nge mbakiso mu ngwa iyeyi yandinotangisa, ngobe bathu banjinji bakazwilulwamisila kundigwisa.

¹⁹Ndzimu, iwo ugele mu tjigalo tje bushe kudwa ntolo, unowohwa, ngono unowobadelusa ngobe abatoshanduka kakale abatotja Ndzimu.

²⁰Nkwinya wangu wakabhata nzwalani uwe nge maboko ndizo kashandukila tjidumano tjedu.

²¹Nge matama manyolo kupinda bhatha, koga moyo uwe unoalakana ngwa koga; nge matama manyolo kupinda mafuta, koga malebeswa wukuti matama iyawo akabe ali mathumo akateya.

²²Tola mitolo iyo uyibige muna Yahwe; ndizo banowokumilidza; Yahwe abatowotongoletja balulwami bakatshedugwa.

²³Koga imwi, Ndzimu, mowobalashila pasi ibabo basakalulwama, mu gomba lakangina. Zwing'wamalopa ne mapitipiti abatowotjila nenguba lili gaswa le mazhuba abo. Koga imi ndowogalabgwe mu muli Ndzimu.