Read Kalanga Njimbo 59 Bible Online

Njimbo 59 - Kalanga bible

Njimbo 59

¹Mundiangule mu zwita zwangu, Ndzimu; mundivikile muna ibabo banondigwisa.

²Mundiangule muna ibabo banoshinga bubi; munditjidze muzwing'wamalopa.

³Nangwenu bakandilalila beshaka pedza butjilo gwangu. Ibabo bakasima banondigwisa, ngono kusina mmwe nlandu kene tjibi tjabanondigwisila Yahwe,

⁴akuna itjo tjandakatjinya, koga banolabuka bezwilulwamisila kundihwisa zogwadza. Milikani, mundibhatshe kakale mubone tjinoshingikala!

⁵Yahwe Ndzimu we mibunga, Ndzimu we Iziraela. Mukani mulobe zwitjaba zose; mushaye wamasiya wa ibabo bematjenjedu banotjenjelela kuthama bubi.

⁶Madekwana mamwe ne mamwe banobuya, bebukula se mbgwa kakale beyendayenda mu nzi nkulu.

⁷Habajee, banobomba nge milomo yabo, ne matama anopitsha mu milomo yabo, banoalakana beti, “Ndiani unowotihwa?”

⁸Koga mobaseka, Yahwe moseka tjaba dzose bulengwe.

⁹Imwi simba langu, ndowogala ndilipejo namwi; ngobe imwi, Ndzimu, ndimwi luswingo gwakandibakilila.

¹⁰Ndzimu wangu unowondishanganidza mu ludo gwawo gusingazunguzike; Ndzimu wangu unowothama kuti ndikunde zwita zwangu.

¹¹Musibabulaye, pamwe bathu bakanyi kwangu bangadwa bekangang'wa; thamani kuti badzungayile nge simba lenyu, mubadelusile pasi, imwi She, tjivikili tjedu.

¹²Muthamila tjibi tje milomo yabo ne matama anodwa mu milomo yabo. Ngababhatshigwe nge mazwikudzu abo. Muthamila bhiso ne manyepkhwa abanoleba.

¹³Mubalobese nge bushongola gwenyu, mubalobese kuswikila bepelela. Kuti bathu bazibe kuti Ndzimu unobusa tjaba ya Jakubo kunoti ku phelelo dze shango.

¹⁴Madekwana mamwe ne mamwe banobuya, bebukula se mbgwa kakale beyendayenda mu nzi nkulu.

¹⁵Banotendeleka beshaka zojiwa, kakale bebomba ha basingawane tjinobagutsha.

¹⁶Koga ndowomba ngekwe simba lenyu; ndowombila pezhugwi ngekwe ludo gwenyu gusingazunguzike kuli mangwanana. Ngobe makabe luswingo gwakandibakilila nenge dizhilo langu mu nsi we kudziyidzika.

¹⁷Imwi simba langu, ndowomumbila njimbo dzinomukudza, ngobe imwi, Ndzimu, mu luswingo gwakandipoteleka, mu iwo Ndzimu unondilakidza ludo gusingazunguzike.