Read Kalanga Njimbo 64 Bible Online

Njimbo 64 - Kalanga bible

Njimbo 64

¹Ihwani hwi langu, imwi Ndzimu, mu kung'ong'ola kwangu; tjengetani butjilo gwangu mu tjita tjinotjisa.

²Mundisumbike pa kulangana kwe babi, ne mu goko le babi,

³ibo banokuswa ndimi dzabo se mathumo banoleba matama anobhaya se misebe,

⁴beposa balilelile bathu basina nlandu; banolibilidza beposa kakale basingatje.

⁵Banonamatila mazwimisilo abo mabiibi; banolebeleka ngekwe kuteya matati abo pakasumbikika, bealakana beti, “Ndiani ungatibona?

⁶Ndiani ungashakisisa kabona bugebeng'a gwedu? Tabumba nkumbulo we kulalila nge butjenjedu.” Moyo we nthu ne njalakang'wa dzidze zwimukatikati.

⁷Koga Ndzimu unowobaposa nge nsebe wawo; banowokubadziwa tjinyolotjo.

⁸Nge zila ye ndimi dzabo, Ndzimu unowobalobesa; bose banowobabona banowotetema ngotja.

⁹Ndizo mmwe ne mmwe unowotja banowoleba tjakazhisiwa nge Ndzimu, bakakanuka tjawakathama.

¹⁰Balulwami ngabashathe muna Yahwe kakale batizhile muwuli. Bose bakatambunuka mu moyo ngabakudziwe.