Read Kalanga Njimbo 65 Bible Online

Njimbo 65 - Kalanga bible

Njimbo 65

¹Gudzo nge lenyu, Ndzimu, mu Ziyoni; kugadzabgwe kwedu towokushingikadza.

²Imwi munodabila ntembezelo! Mmwe ne mmwe unowozha kumuli.

³Ngekwe zwibi zwedu, ha matjinyo edu eti kulila, motizwiibhatigwa.

⁴Bakakombolegwa ibabo bamakashala mukabazhisa kutjilila mu ng'umba yenyu. Towogutshiwa nge ndulamo ye ng'umba yenyu, ng'umba yenyu yakayengemala.

⁵Nge mishingo inotjisa motidabila nge jidzo, Ndzimu we jidzo ledu; ndimwi galabgwe kwe phelelo dzose dze shango ne gungwa gumwe ne gumwe.

⁶Nge simba lenyu makathama matombo; muna masimba makulu.

⁷Monyaladza zhoba ye makungwa wose, zhoba ye matuthu e vula dzawo, kudzongana kwe bathu.

⁸Ibabo banotjilila mu migathu ikule kule ye shango banotjisiwa nge zwilakidzo zwenyu; mothama zila dze mangwanana ne dze madekwana dzikamimila ngoshatha.

⁹Mokumba shango mukayidilidzila, moyifumisa kwazo; gwizi gwe Ndzimu guzhele vula; mopa bathu mathunde, ngobe makayilulwamisila ikoko.

¹⁰Modilidzila ngolo dzayo kwazo, mutambunudza mabundo ayo munyolodza mavu ayo nge midumbi, mukombolela kula kwe zwidzwalo.

¹¹Moambadza lubaka gwe gole nge tjiala tje guto; pa mapinda fumwa inotebukana.

¹²Mafulo amu tjilambanyika anotebukana nge zojiwa, matombo anozwiambadza shatho,

¹³Makula amuhwunde ye gwizi azhele pkhwizi ne mbudzi, minda izhele mathunde, zose zomimila zwimba nge shatho.