Read Kalanga Njimbo 66 Bible Online

Njimbo 66 - Kalanga bible

Njimbo 66

¹Thamilani Ndzimu zhoba ye shatho, imwi shango yose.

²Imbani ngekwe bukulu gwe zina lawo; muwupeni gudzo gulugulu.

³Idwani Ndzimu muti, “Mishingo yenyu inotjisa seni! Nge zila ye simba lenyu gulu, zwita zwenyu zoshushubala mbeli kwenyu.

⁴Shango yose inomunamata; banomumbila njimbo dzinomukudza banomba njimbo dzinokudza zina lenyu.”

⁵Izhani mubone mishingo ya thamwa nge Ndzimu. Mishingo yawo mikulu seni yaunothamila bathu!

⁶Wakashandula gungwa gukabe shango yakawomelela; bakatjuluka gwizi nge makumbo. Ipapo takashatha muwuli,

⁷iwo unobusa nge simba lawo gulu nge kusingapele, zhisho lawo lakalinga zwitjaba zose, bapanduki ngabasizwikudze.

⁸Kudzani Ndzimu wedu, imwi bathu, zhoba ye kukudziwa kwawo ngayihwike,

⁹iwo wakatilisa pakati pe batjili kakale awuzoletja makumbo edu katelela.

¹⁰Imwi Ndzimu, makatilika; makatilika se siliva ilikiwa.

¹¹Makatibhatshila nge gwanga; makabiga mitolo inolema kushule kwedu;

¹²makaletja bathu bakatatha pezhugwi kwe misholo yedu; takapalama moto kakale tikapalama vula; koga makatizhisa pathu pakashaladuka.

¹³Ndowozha mu ng'umba yenyu ne zwipo zwinopisiwa; ndowoshingikadza tuna kwangu,

¹⁴iko kwandakaleba nge nlomo wangu kakale agadzabgwe nge wangu nlomo ndili mu kudziyidzika.

¹⁵Ndowomudusila zwipo zwinopisiwa zwakakola, zwili mu busi gwe tjibhayilo tje nyundo; ndowothama tjibhayilo tje mikono ne mbudzi.

¹⁶Izhani muhwe, imwi mose munotja Ndzimu, ngono ndowoleba tjawakandithamila.

¹⁷Ndakalilila pezhugwi ndililila iwo, ngono wakakudziwa nge ndebo yangu.

¹⁸Ha ndakabe ndashathila jinyo mu moyo wangu, She banobe basakanditeedza;

¹⁹koga malebeswa Ndzimu wakateedza bakateedza matama e ntembezelo wangu.

²⁰Ndzimu ngaukudziwe, ngobe awuzolamba ntembezelo wangu kene kuli kusandipa ludo gwawo gusingazunguzike.