Read Kalanga Njimbo 68 Bible Online

Njimbo 68 - Kalanga bible

Njimbo 68

¹Ndzimu ngabamilike, zwita zwawo zose ngazwipaladziwe; bose banowubenga ngabapaladziwe.

²Se busi gututudziwa nge phepo, Ndzimu ngawubatutudze; se phola inyawuka pa moto, babi ngabalobesiwe nge Ndzimu.

³Koga balulwami ngabashathe; ngabashathe mbeli kwe Ndzimu; ngabashathe kwazokwazo bapululudze.

⁴Mbilani Ndzimu, imbani njimbo dzinokudza zina lawo; milidzani mahwi muwumbile lumbo iwo unoyenda ali mu makole zina lawo ndi Yahwe muukudze.

⁵Tate besiyang'wa kakale mmilili we tjilikadzi ndiwo Ndzimu mu bugalo gwawo gwakayengemala.

⁶Ndzimu unopa badziyili nzi kuti bagale muwuli; unotungamilila basungwa mukubhudilila, koga bapanduki banotjilila mu shango yakathukudzika.

⁷Imwi Ndzimu, makati pamakabe makatungamila bathu benyu, makapalama tjilambanyika,

⁸shango yakatengenyeka, zhuzhugwi kukatebula vula, pawakabe ulipo Ndzimu, Ndzimu we Sinai, pawakabe ulipo Ndzimu, Ndzimu we Iziraela.

⁹Ndzimu, makanisa vula isishoma; makamusa shango yenyu yakabe yathukudzika.

¹⁰Pkhwizi dzenyu dzakawana bugalo ipapo; mubululwami gwenyu, Ndzimu, makapa basheti.

¹¹She banopa ndaulo; banji bakasenga matama iyawo;

¹²“Bomambo be babhayani banotizha, banotizha!” Bakadzi ku mizi bakathubukana thundu yakatapiwa,

¹³nenguba begala pakati kwe pkhwizi, mapapilo e njiba akambadziwa siliva, malunganilo akambadziwa golide ye mbala nkwakwa.

¹⁴Pakati Masimbawose bakapaladza bo mambo ikoko, kapuku tjikawa mu Zalimoni.

¹⁵Iwe dombo gulu, Dombo le Bhashani. Iwe dombo linatheswi njinji, Dombo le Bhashani!

¹⁶Ini ulinga ngoyemula, iwe dombo letheswi njinji, ku dombo lakadiwa nge Ndzimu, kuti libe bugalo gwawo, iko Yahwe kwabanowogala nge kusingapele?

¹⁷Nge koloyi hwuluhwulu njinji dzili zwiwulu zwinjinji, She bakadwa ku Sinai bezha pathu pakayengemala.

¹⁸Makatatha dombo lakakulila pezhugwi, makatungamila bakatapiwa mu ngwa kakale muamutjila zwipo mu bathu, ne muna ibabo banopandukila bugalo gwa Yahwe Ndzimu.

¹⁹Ndzimu ngawukudziwe, iwo unotimilidza zhuba ne zhuba; Ndzimu i jidzo ledu.

²⁰Ndzimu wedu Ndzimu we jidzo Yahwe, ibo She, i dizhilo lebanotizha lufu.

²¹Koga Ndzimu unowopkhwanya misholo ye zwita zwawo. Zwiala zwina bukuse zwa ibabo banoyenda mu zila dzabo dze bubi gwabo.

²²She bakati, “Ndowobabuza kudwa ku Bhashani, ndowobabuza kudwa kusikusi kwe gungwa,

²³kuti ndizo mungule makumbo enyu mu malopa abo, kuti ndizo mbgwa dzenyu dziwane gobe mu zwita zwenyu.”

²⁴Nlongolongo we bathu benyu wakabong'wa ne mmwe ne mmwe, nlongolongo we gubungano le Ndzimu, mambo wangu lingina pa bugalo gugwe gwakayengemala.

²⁵Bambi bali mbeli, balidzi be zwilidzo bali shule, pakati kwabo kuna baanadi belidza dzithamborini:

²⁶“Kudzani Ndzimu mu gubungano gulu, ibo Yahwe, imwi nsenya usingapkhwe we Iziraela!”

²⁷Bhenjamini, iye ntukunu tjose mubali, akabatungamila hadzasha dze Juda ne gupo labo, ne hadzasha dze Zebhuloni, ne hadzasha dze Nafutali.

²⁸Zhisani masimba enyu makulu, Ndzimu; lakidzani simba lenyu, Ndzimu, sekwa makatongothama mu lubaka gwakapinda.

²⁹Muthamila ng'umba yenyu iku Jerusalema bomambo kwabanoyisa zwipo.

³⁰Tjemelani Egipiti inonga vubu inogala mu shanga dze gwizi. Tjemelani tjaba dzinonga mikono ina phulu, dzinotshamba tshamba bathu dzishaka siliva. Tshambani nge makumbo ibabo banotolela bathu makhetho, paladzani bathu banoshathisiwa nge ngwa.

³¹Hadzasha dzowodwa ku Egipiti; shango ye Itopiya ngailibilidzile kumilidzila Ndzimu maboko abo beukudza.

³²Mbilani Ndzimu imwi mibuso ye shango; mbilani Ndzimu njimbo dzinoukudza,

³³ibo banoyenda mu zhuzhugwi, zhuzhugwi lakabepo ntolo tjose, hwililani, Ndzimu unodusa hwi lawo lina masimba makulu.

³⁴Lebani muti Ndzimu una masimba, unobusa Iziraela; zhuzhugwi lolakidza simba lawo.

³⁵Ndzimu unotjenamisa seni uli mu bugalo gwawo gwakayengemala, Ndzimu we Iziraela unopa simba ne matatabuko bathu bawo. Ndzimu ngawukudziwe.