Read Kalanga Njimbo 69 Bible Online

Njimbo 69 - Kalanga bible

Njimbo 69

¹Munditjidze Ndzimu, ngobe vula yabe pejo ngotola butjilo gwangu.

²Ndophobela mu dope njinji lakangina akuna pandingamapo. Ndangina mu vula yakangina, ndizo nsundila unonditola.

³Ndatjinyadziwa ngolila kwangu; hwulo dzangu dzakawomelela mesho angu aatjabona kwazo ndanyala ngokulindila dabilo, Ndzimu wangu.

⁴Ibabo banondibenga banji pa mavudzi e nsholo wangu, koga ndisabati tjimwe; ibabo banoshaka kundilobesa banjinji, zwita zwangu zwinonditilika nlandu zwindinyepela. Apa ndakafanila bgwiliza tjandisakakwiba kene?

⁵Imwi Ndzimu wangu; zwithu zwandakatjinya azwizosumbikika mu mesho enyu.

⁶Musiletjedze ibabo banogalabgwe mu muli bakabhatisiwa shoni nge kwangu, imwi She Yahwe, Ndzimu we Mibunga musiletjedze ibabo banogalabgwe mu muli bakabhatisiwa shoni nge kwangu, imwi Ndzimu we Baiziraela.

⁷Ndi nge kwenyu kuti ndibe ndakadzikitadzila tukwa, nenge kubhatisiwa shoni.

⁸Ndatjibe ntaya muna bakanyi kwedu, ndatjibe nzhi mu bana ba mme yangu.

⁹Kutukutilila ng'umba yenyu, ndiko kunondija; masapa a ibabo banomutuka akawila mundili.

¹⁰Ndakati ndizwiyisa pasi nge kuzwinyima zojiwa, bakanditukila kuthama ndiyijalo,

¹¹ndakati ndithama saka tjiambalo tjangu tje tjililo, ndakashanduka mazapkhwa mubali.

¹²Pagegwe ntutshi konyeyiwa imi, kakale balaladzi banothama njimbo nge kwangu.

¹³Koga imi nge kwangu, ntembezelo wangu ndowulingisa kumuli, imwi Yahwe. Mu lubaka gwakafanila, Ndzimu, mu buzhalo gwe ludo gwenyu gusingazunguzike, mundidabile.

¹⁴Nge bhatsho yenyu isingabgwilile shule, mundibhatshe kuti ndisiphobele mu dope; thamani kuti ndiangule mu zwita zwangu ne mu vula yakangina.

¹⁵Musiletje nsundila ukanditola, kene kuli kumidziwa nge dziba lakangina, kene kuli kuvukidzigwa nge gomba.

¹⁶Mundidabile Yahwe, ngobe ludo gwenyu gusingazunguzike gwakalulwama, kuyendidzana nge bunji gwe ngoni dzenyu mundikumbule.

¹⁷Musisumbikile nlanda wenyu buso gwenyu, ngobe ndodziyidzika kukulu, libilidzilani kundidabila.

¹⁸Sedzelani pandili, munditjidze, mundiangule ngekwe zwita zwangu.

¹⁹Moziba masapa andinotukwa, nenge kubhatisiwa shoni kwangu, nenge kushayigwa buthu; zwita zwangu zose mozwiziba.

²⁰Masapa akandigwadzisa moyo, ndatjizwitoboka. Ndakashaka ungandihwila ngoni, asheta.

²¹Bakandipa nti unobulaya beti zojiwa, ndakati ndina nyota bakandipa nkumbi wakatyorowa kuti nding'we.

²²Dzene tafuli yabo ingabe dati ku bali, ikabe dati linowobhatshila bazwalani babo.

²³Mesho abo ngaapofupale kuti ndizo basibone, mishongoshongo yabo ngayi gale yakagogonyala.

²⁴Mubadile lifushe gwe kugwadzamoyo kwenyu, kugwadzamoyo kwenyu kunothuta ngakubapise.

²⁵Dzene magalo abo angabe matongo; ngakushete unowogala mu mishasha yabo.

²⁶Ngobe banogwadzisa ibabo bamakaloba, banodwilila bedziyidza ibabo bamakakubadza.

²⁷Paphani shamu yabo nge imwe shamu; dzene bakasibe nge gobe mu jidzo lenyu.

²⁸Ngababukushiwe mu lukwalo gwe banotjila; ngabasikwagwe pang'ompela ne balulwami.

²⁹Koga imi ndakazwiyisa pasi kakale ndimukuhwa zogwadza, dzene jidzo lenyu Ndzimu, lingandivikilila.

³⁰Ndowokudza zina le Ndzimu ne lumbo; ndowokudza Ndzimu nge kumboka.

³¹Oku kowoshathisa Yahwe kupinda tjipo tje ngabe kene uli nkono una manyanga ne thozo.

³²Bakatshambilidziwa ngabakubone ikoku bashathe; imwi munoshaka Ndzimu, mimoyo yenyu ngayimuke.

³³Ngobe Yahwe banohwa mitembezelo ye basheti, kakale abatolengudza bathu babo bamu busungwa

³⁴kudzimu ne shango ngazwikudze She, gungwa gumwe ne gumwe nenge tjimwe ne tjimwe itjili tjimuali ngazwikudze She.

³⁵Ndzimu unowotjidza Ziyoni kakale unowomusa mizi mikulu ye Juda; nenge balanda bawo banowogala imomo bakayizwitolegwa iyeyo mizi;

³⁶bana be balanda be Ndzimu banowozwitolegwa mizi iyeyo, na ibabo banoda zina lawo banowogala mu mizi iyeyo.