Read Kalanga Njimbo 7 Bible Online

Njimbo 7 - Kalanga bible

Njimbo 7

¹Yahwe Ndzimu wangu, ndotizhila kumuli. Munditjidze mundigwile muna bakandisala shule,

²kusajalo banowondipalulanya se shumba, bendikwebakwebanya, kusina unondigwila.

³Yahwe Ndzimu wangu, ha kuli kuti ndakathama ikoku, ha kuli kuti kuna nlandu mu ndili,

⁴ha kuli kuti ndakabgwilizila una mbakiso nami nge mbipo, kene kuli kuti ndakatapila tjita tjangu ndisayi tjimwe,

⁵ha kwakajalo, tjita tjangu ngatjitatane nami, tjindibhate tjitshambile butjilo gwangu pasi nge makumbo tjindiladzike mu hwuluba.

⁶Milikani Yahwe, mu kugwadzamoyo kwenyu! Milikani mugwe ne bushongola gwe zwita zwangu! Milikani, Ndzimu wangu, ngobe makabiga zhuba le sumikiliso.

⁷Gubungano le bathu bose, ngalikubungane kumupoteleka; Mubalaule muli mu tjigalo tjenyu.

⁸Yahwe ndibo nsumikilisi we bathu bose, mundisumikilise kunoyendidzana ne ndulamo yangu Yahwe nenge kuyendidzana ne kusheta nlandu kwangu!

⁹Thamani kuti bubi gwe babi gupele, koga musimise balulwami, imwi munoshakisisa mikumbulo ne mimoyo, imwi Ndzimu wakalulwama.

¹⁰Ndzimu ndiwo tjivikili tjangu iwo unotjidza bana mimoyo yakatambunuka.

¹¹Ndzimu nsumikilisi wakalulwama, Ndzimu unolakidza bushongola gwawo mazhuba wose.

¹²Ha nthu asingashanduke, Ndzimu unowokuswa thumo lawo, ukapeta dati le misebe.

¹³Wakalulwamisa mathumo awo anobulaya, unolulwamisa misebe ikanga moto.

¹⁴Bonani njalakang'wa dze bathu babi sekwa dzizhele mbipo, Bakazwisenga bubi, bakazwala manyepkhwa,

¹⁵banotsha gomba bakalivukula, ngono bakawila mu gomba labatsha ibo.

¹⁶Sahwa kwabo kohwisa ibo zogwadza, da gwa kwabo kowodelukila mu misholo yabo.

¹⁷Ndowoboka Yahwe ngekwe ndulamo yabo, ndowomba ndikudza zina la Yahwe, ibo bapezhugwi zhugwi.