Read Kalanga Njimbo 71 Bible Online

Njimbo 71 - Kalanga bible

Njimbo 71

¹Ndotizhila kumuli Yahwe; thamani kuti ndisitongo bhatisiwa shoni.

²Mu bululwami gwenyu munditjidze kakale mundigwile; munditeedze kakale munditjidze.

³Ibeni shongwe ye dizhilo langu. Ibeni luswingo gwakasima, kuti nditjidziwe, ngobe mu shongwe yangu kakale mu luswingo gwangu.

⁴Munditjidze, imwi Ndzimu wangu, mundiduse mu simba le babi, mu kubhakhwa nge basingazibe ndulamo kakale bana mimoyo mikukutu mu kushinga bubi.

⁵Imwi She Yahwe, ndimwi kugalabgwe kwangu, ndakagalabgwe mu muli Yahwe kudwa mu butjetjana gwangu.

⁶Ndakanayila imwi kudwa mu kuzwagwa kwangu; ndimwi makandidusa mu ntumbu wa mmeyangu. Ndodwilila nge kumukudza.

⁷Ku banji ndakabe ndinga tjilema, koga imwi mu dizhilo langu lakasima.

⁸Nlomo wangu uzhele kumukudza, ne kukudza zina lenyu zhuba lose.

⁹Musindilashe mu nsi we kukwegula kwangu; musindifupatile andapelegwa nge masimba.

¹⁰Zwita zwangu zolebeleka nge kwangu, ibabo banoshaka ndibulaya banolangana.

¹¹Banoti, “Muntatamile mu mbhate, Ndzimu wankanlasha akuna ungantjidza.”

¹²Imwi Ndzimu, musibe kule nami; Imwi Ndzimu wangu, libilidzani kundibhatsha!

¹³Ibabo banonditilika nlandu ngababhatisiwe shoni kakale banyeledziwe; ibabo banoshaka kundihwisa zogwadza ngabadadigwe bashayigwe hanya kunobhatisa shoni.

¹⁴Koga imi ndowodwilila ndigalabgwe, kakale ndowodwilila ndimukudza kakale kanjinji.

¹⁵Nlomo wangu unowoleba ngekwe mishingo yenyu ye ndulamo, ne ngekwe mishingo yenyu ye jidzo zhuba lose, nenguba ili minji kusina tjilizanyo.

¹⁶Ndowozha ndikudza mishingo mikulu ya She Yahwe, ndowokudza ndulamo yenyu koga.

¹⁷Imwi Ndzimu, kudwila mu butjetjana gwangu makandidiya, ndizo ndodwilila ndikudza mishingo yenyu inotjenamisa.

¹⁸Ndizo ne mu nsi we kukwegula ne kuthunya nsholo, imwi Ndzimu musindilashe, kuswikila ndileba ngekwe simba lenyu gulu mu zwizekugwana zose zwinowozha.

¹⁹Simba lenyu nenge ndulamo yenyu, imwi Ndzimu, zoswika pezhugwi zhugwi, imwi makathama zwithu zwikulu, imwi Ndzimu, ndiani unonga imwi kene?

²⁰Imwi makathama kuti ndibone kudziyidzika kunjinji ne zogwadza zwinjinji mowondimusa kakale; kudwa pasi pasi kwe shango mowondimilidzila pezhugwi kakale.

²¹Mowopapha kukudziwa kwangu, mukandinyaladza kakale.

²²Ndowomukudzabo nge dende ndimukudzila kugalikabgwe kwenyu imwi Ndzimu. Ndowomba njimbo dzinomukudza ndilidza tjilidzo tje laya, imwi N'yengemali we Iziraela.

²³Nlomo wangu unowomimila ngoshatha andimumbila njimbo dzinomukudza; na iyo meya yangu yamakatjidza.

²⁴Zhuba lose lulimi gwangu gowolebeleka ngekwe bululwami gwe bhatsho yenyu, ngobe ibabo bakagwisa kundihwisa zogwadza bakabhatisiwa shoni, bakashayigwa ngoni.