Read Kalanga Njimbo 72 Bible Online

Njimbo 72 - Kalanga bible

Njimbo 72

¹Imwi Ndzimu ipani mambo zila ye kusumikilisa kwakatambunuka, nkololo we bushe mumpe ndulamo yenyu,

²kuti ndizo mambo asumikilise bathu benyu nge ndulamo, nenge bathu benyu banosheta basumikilisiwe kwakatambunuka.

³Dzene shango ingabe ne kunyalala ikabhudilila nenge kubona ndulamo.

⁴Dzene mambo bakalebelekela bashayi, katjidza bana be basheti kakale kapkhwapkhwata batshambilidzi.

⁵Dzene bathu bakamunamata zhuba ne mwedzi zwitjapenya, mu zwizekugwana zose.

⁶Dzene anganga vula inona mu likulakula, se midumbi inodilidzila shango.

⁷Kuti mu mazhuba awe dzene ndulamo ingawanda, nenge kunyalala kuandame kuswikila mwedzi wafa.

⁸Dzene angabusa kudwa ku gungwa kunoti ku gungwa ne kudwa ku gwizi kunoti ku phelelo dze shango.

⁹Dzene zwita zwizwe zwinganthigamila, kakale zwita zwizwe ngazwilengudzike.

¹⁰Dzene bomambo be Tashishi nebe zwigwizi zwikulekule banganzhisila zwipo, dzene bomambo be Sheba nebe Seba banganzhisila zwipo.

¹¹Dzene bomambo bose bangawila pasi bakanthigamila, tjaba dzose ngadzinshingile.

¹²Ngobe unotjidza basheti abedana, bashayi na ibabo basina mbhatshi.

¹³Unohwila zogwadza ibabo basina matatabuko kakale besheta, kakale unotjengeta matjilo e basheti.

¹⁴Mukutshambilidzwa nenge kuhwisiwa zogwadza, unobatjidza kakale matjilo abo anosheteka kwazo mu mesho awe.

¹⁵Dzene angatjila tjibaka tjilefu! Dzene golide ye Sheba angaipiwa. Dzene angatembezelegwa misi yose. Dzene angakombolegwa nge misi yose.

¹⁶Dzene shango ingabe ne mathunde manjinji dzene angapasula kafukidza shango; dzene zwizwalo zwayo zwikanga zwe Lebanoni; kakale dzene bathu bangawanda mu mizi mikulu se bushwa gumu shango.

¹⁷Dzene zina lile lingabepo tjatjose, tjilumbi tjitje tjilalame se zhuba. Dzene tjaba dzose dzinga kombolegwa nge zina lile; bathu bose banon'dana wakakombolegwa!

¹⁸Ngakukudziwe Yahwe, Ndzimu we Iziraela, iwo koga unothama zwithu zwinotjenamisa.

¹⁹Ngakukudziwe zina lawo gulu nge kusingapele: dzene gudzo lawo linga zhala shango yose. Ngakujalo kakale Ngakujalo.

²⁰Mitembezelo ya Dafite nkololo wa Jesi yapelela.