Read Kalanga Njimbo 73 Bible Online

Njimbo 73 - Kalanga bible

Njimbo 73

¹Malebeswa Ndzimu wakalulwamila Iziraela, ibabo bana mimoyo mitjena.

²Koga imi nge kwangu ndoyenda ndikweba makumbo; ndakanyala nkumbulo.

³Ndakabe ndina ndandala ngekwe banozwikudza, pandakabe ndabona bhudilila kwe babi.

⁴Ngobe basina mang'oni, mibili yabo yakazwilizanila kakale ikwidzima.

⁵Abateli mu tshiyilo se bamwe bathu, abana magwadzi se bamwe bathu,

⁶Bakasenga mazwikudzo abo se bakaambala i timbi. Phipiti yakabaambala se hazu.

⁷Mimoyo yabo inotebukana nge mbipo, mikumbulo yabo ye bubi ainatjilizanyo.

⁸Banogongobola kakale belebeleka nge lubengo banozwiloba zwifuba ngekwe tshambilidzo.

⁹Banonyanyayidza mazhuzhugwi, ndimi dzabo dzikalaula shango.

¹⁰Ndizo bathu banoshanduka bakabakudza, bebuya beshaya nlandu mubali.

¹¹Ndizo banoti, “Ndzimu ungaziba tjini? Apa kuna luzibo muna Upezhugwi zhugwi kene?”

¹²Ndiko sekwa babi bali iko bagele bakati khenyenye, banowatsha fumwa dzabo.

¹³Ndakatjenapadzila moyo wangu suli ndakangulila maboko angu suli ndilakidza ndisina nlandu.

¹⁴Zhuba lose ndakahwisiwa zogwadza, kakale ndolobgwa shamu mangwanana mamwe ne mamwe.

¹⁵Ha ndakabe ndati, “Ndowolebeleka yetji.” Ndakabe ndowobe ndashayila bana benyu lebeswa.

¹⁶Koga ndakati ndigwisa hwisisa kose ikoku, awana ili masimbamalashe,

¹⁷kudzina ndangina mu bugalo gwe Ndzimu gwakayengemala, ndizo ahwisisa bhelelo labo.

¹⁸Nge malebeswa mobagadza mu magalo anosodzoloka, mubaligila mu golomodzo.

¹⁹Banokolomogwa tjinyolotjo seni, bekubigwa kutjena nge lutjo!

²⁰Mowoti mumuka imwi Yahwe banonga mawoloto anokanganika ha nthu emuka mu hwope. Mukumuka kwenyu mowobanyeledza bakakanganika.

²¹Kwakati meya yangu yahwa zogwadza kwazo, pandakabe ndabhayika mu moyo,

²²ndakabe ndili tjilengwe kakale ndisina luzibo, ndakabe ndinga tjibandana mbeli kwenyu.

²³Nenguba kwakajalo ndinamwi misi yose, makandibhata nge luboko gwangu gwe luji.

²⁴Makandilakidza zila nge gumbuludzo lenyu, gwe bupelo mowondiamutjila nge kunditeta.

²⁵Apa ndiani wandinaye kuzhe kwenyu kene? Mu shango akuna tjandinoyemula kuzhe kwenyu.

²⁶Nyama yangu ne moyo wangu zwinga kong'wa, koga Ndzimu ndiwo simba le moyo wangu ne gobe langu nge kusingapele.

²⁷Ndolebesa, ibabo bakule namwi banowoloba, molobesa bose ibabo basingagalebgwe mu muli.

²⁸Koga imi nge kwangu, kwakanaka kugala pejo ne Ndzimu. Ndakathama She Yahwe dizhilo langu, kuti ndizo ndilebe ngekwe mishingo yabo.