Read Kalanga Njimbo 74 Bible Online

Njimbo 74 - Kalanga bible

Njimbo 74

¹Ndzimu, ini mutilashila tjose kene? Ini bushongola gwenyu guthungayilila pkhwizi dze fulo lenyu kene?

²Kumbulani gubungano lenyu lamakazwishaluligwa ntolo, ilo lamakadzutunula kube itjaba tje lukata gwenyu. Kumbulani Dombo le Ziyoni, ipo pamakatongo gala.

³Shandukilani ku matongo agelile tjose, tjita tjakakolomola tjimwe ne tjimwe mu bugalo gwakayengemala.

⁴Zwita zwenyu zwakabomba mu bugalo gwenyu gwakayengemala bakabiga zwilakidzo zwabo zwe kukunda.

⁵Bakazwitola se balume bakabhata mashathu bepalama ishaka benotema miti ne mashathu.

⁶Bakapkhwanya kose kwakabezhiwa kukanakisiwa ngokwagwa, nge mashathu ne zwishakhwana zwabo.

⁷Bakapisa bugalo gwakayengemala nge moto, bakatemapadza bugalo gwe zina lenyu, nge kuguligila pasi.

⁸Bakazwidwa beti, “Towobakolomodza tjoselele,” bakapisa mabazhe wose e bushanganilo e Ndzimu mu shango.

⁹Atitjabona zwilakidzo zwedu, akutjina balebesambeli, ngono akuna ne nng'ompela upakati kwedu unoziba kuti kowodza kukabe lini.

¹⁰Kowodza kukabe lini Ndzimu, tjita tjimulengudza kene? Apa tjita tjowotuka zina lenyu nge kusingapele kene?

¹¹Ini mushungata luboko gwenyu, hwutini mulambisila luboko gwenyu pa ifuba tjenyu kene?

¹²Koga Ndzimu mambo wangu, kwakadwila ntolo, muzhisa jidzo mu shango.

¹³Makathubukanya gungwa nge simba lenyu gulu, makapkhwanya misholo ye bhophona mu vula.

¹⁴Ndimwi makapkhwanya misholo ye zhithu le gungwa linoyi Livatani, mukalipa zwitjili zwe tjilambanyika kulija.

¹⁵Makazhula misenya ne hwobana makapkhwisa njizi dzagala dziwunga dzisingapinde.

¹⁶Masikati nde enyu, busiku na igo nde gwenyu, makabiga zhuba ne mwedzi mu magalo azo.

¹⁷Ndimwi makathama migathu yose ye shango, makathama tjilimo ne mbaba.

¹⁸Kumbulani Yahwe sekwa makalengudziwa nge tjita ne sekwa bathu be zwilengwe bakatuka zina lenyu.

¹⁹Musipe zwibandana meya ye njiba yenyu, musikangang'wile tjose butjilo gwe bashayi benyu.

²⁰Kumbulani tjidumano tjenyu, ngobe magalo akatizwi e shango, azhele magalo e bupanduki.

²¹Musiletjedze banolingigwa pasi bakabhatisiwa shoni, dzene bashayi ne basheti bakakudza zina lenyu.

²²Milikani imwi Ndzimu, muzwilebelekele, kumbulani sekwa zwilengwe zwinomulengudza zhuba lose.

²³Musikangang'we zhoba ye banyanyayidzi benyu, dzonga kwe zwita zwenyu komilika kuyendilambeli.