Read Kalanga Njimbo 77 Bible Online

Njimbo 77 - Kalanga bible

Njimbo 77

¹Ndakalilila pezhugwi ndililila ku Ndzimu, ndimimilila ku Ndzimu kuti ndizo undihwe.

²Mu zhuba le kudziyidzika kwangu ndoshaka She, mu busiku luboko gwangu gwakatambunudziwa gusinganete, meya yangu yakalamba nyaladziwa.

³Ndokumbula ngekwe Ndzimu, ngono agomela, ashakisisa mu moyo wangu, ngono apela meya.

⁴Mondikonedza kubhatshanya mesho. Ndodziyidzika kunondikonedza lebeleka.

⁵Ndokumbula ngekwe mazhuba akapinda, ndokumbula makole a ntolo.

⁶Ndobalabala ne moyo wangu busiku, ndoalakana abuya ashakisisa meya yangu. Ngono abe nditi,

⁷“Apa She banowotilashila tjose kene? Apa abangatjame nami kakale kene?

⁸Apa ludo gwabo gusingazunguzike gowotothola tjose kene? Apa kugadzabgwe kwabo kwe tjibaka tjose kwakapela kene?

⁹Apa Ndzimu wakakangang'wa kube ne ngoni kene? Apa bushongola gwawo gwakasitila mahwilo zogwadza awo kene?”

¹⁰Ngono ndoti, “Wuhwa zogwadza kwangu kunothama kuti luboko gwe luji gwe Upezhugwi zhugwi gundishandukile.”

¹¹Ndowokumbula mishingo ya Yahwe; ee, ndowokumbula makaabadzo enyu a ntolo.

¹²Ndowoshakisisa mu moyo mishingo yenyu yose, ndibuya ndikanuka ngekwe mishingo yenyu mikulu.

¹³Zila yenyu Ndzimu yakayengemala. Apa ndiupi ndzimu nkulu se Ndzimu wedu kene?

¹⁴Mu Ndzimu unothama makaabadzo, makalakidza simba lenyu mu njudzi.

¹⁵Nge simba le luboko gwenyu makadzutunula bathu benyu, bakololo ba Jakubo na Josefa.

¹⁶Kwakati vula dzimubona, imwi Ndzimu, kwakati vula dzimubona, dzikatja, vula dzi pasi pasi dzikatetema.

¹⁷Makole akatebula vula, zhuzhugwi kukadadamula, misebe yenyu ikapenya mbizho dzose.

¹⁸Nsindo we kudadamula kwenyu kwakabe mu dutu, lupenyo gwenyu gwakavoneka shango, shango ikatetema ikazunguzika.

¹⁹Zila yenyu yakapalama gungwa, mwazha wenyu ukapalama vula ina masimba. Koga gumbo lenyu pamakatshamba likasibong'we.

²⁰Makatungamila bathu benyu se ngubi ye pkhwizi, nge luboko gwa Mushe na Aroni.