Read Kalanga Njimbo 78 Bible Online

Njimbo 78 - Kalanga bible

Njimbo 78

¹Bhulutanani zwidiyo zwangu, imwi bathu bangu, teedzani matama andinoleba.

²Ndowozhula nlomo wangu apa ifaniso, ndowozumbunula masumbesumbe muna zwa ntolo,

³zwithu zwatakahwa tikazwiziba zwatakabudziwa ndi bobatategulu bedu.

⁴Atitowozwisumbikila bana babo, towozwibudza tjizekugwana tjinozha, gudzo le mishingo ya Yahwe, ne masimba abo, ne makaabadzo abakathama.

⁵Bakathama ndayo kuna Jakubo, bakabiga nlayo mu Iziraela, iwo wabakalaulila bobatategulu bedu kuudiya bana babo.

⁶Kuti ndizo tjizekugwana tjinozha tjiizibe, bana basathu bakazwagwa, banowomilika bakaibudza bana babo,

⁷kuti ndizo babige kugalabgwe kwabo mu Ndzimu, ne kusakangang'wa mishingo ye Ndzimu, koga balondolodze milayo yawo,

⁸kuti basitongodwa benga bobatategulu babo, tjizekugwana tjakawoma nsholo kakale tje bupanduki, tjizekugwana tje moyo wakabe ududumwa, tje meya yakabe isingagalebgwe mu Ndzimu.

⁹Baifureimi, bakabhata matati, bakashanduka mu zhuba le ngwa.

¹⁰Abazolondolodza tjidumano tje Ndzimu, koga bakalamba kuyendidzana ne nlayo wawo.

¹¹Bakakangang'wa tjawakabe wathama, ne makaabadzo awakabe wabalakidza.

¹²Mu mesho a bobatategulu babo mu Egipiti mu ntuthu we Zoani wakashinga makaabadzo.

¹³Wakapalalanya vula ye gungwa ukabapitsha mu guli, ukathama kuti vula ime se duluthulu.

¹⁴Masikati wakabatungamila nge gole, ngono busiku gose ukabatungamila nge tjedza tje moto.

¹⁵Wakaphatula shongwe dzikazhuka mu tjilambanyika, ukabang'wisa vula njinji se inodwa mu madziba akangina.

¹⁶Wakathama wobana dzikadwa mu shongwe, ukathama kuti vula iwungile pasi se njizi.

¹⁷Koga bakadwilila beutjinyila kwakapindilila, bepandukila Upezhugwi zhugwi bali mu tjilambanyika.

¹⁸Bakalika Ndzimu mu mimoyo yabo nge kushaka zojiwa zwabakabe beyemula kwazo.

¹⁹Bakalebeleka kusakanaka ngekwe Ndzimu beti, “Apa Ndzimu ungatilulwamisila zojiwa mu tjilambanyika kene?

²⁰Nenguba akaloba shongwe vula ikatebukana hwobana dzika wunga, apa ne tjiwunga ungatipa itjobo, kene ukapa bathu bawo nyama kene?”

²¹Ndizo, Yahwe bakati behwa, bakazhala bushongola, moto wabo wakathuta wakalingisana na Jakubo, gwadzamoyo kwabo kukalingisana Iziraela,

²²ngobe bakabe basina bugalimoyo mu Ndzimu, kakale basingagalebgwe simba lawo linotjidza.

²³Ipapa Yahwe belaya zhuzhugwi, bakazhula mikoba ye kudzimu,

²⁴bakabanisila mana kuti baje, bakabapa thunde le kudzimu.

²⁵Bathu bakaja tjiwunga tje batumwa be kudzimu, bakabazhisila zojiwa zwakawanda.

²⁶Bakathama kuti phepo ye bhezhuba ihwuhwudze mu mazhuzhugwi, nge simba labo bakatungamila phepo ye burwa,

²⁷bakabadelusila pezhugwi kwabo nyuni dzinowuluka dzili njinji se hwuluba, dzili nyama njinji se nsetje we phili ye gungwa,

²⁸bakathama kuti dzizhe pa bugalo gwabo, kupoteleka mishasha yabo.

²⁹Ngono bakaja bakaguta, ngobe bakabapa tjabakabe beyemula kwazo.

³⁰Koga bakati basathu bakagutsha njemulo dzabo, zojiwa zwitji mu milomo yabo,

³¹bushongola gwe Ndzimu gukabamukila, ngono ukabulaya bakasima tjose mubali, ukalobesa bazhuzha bakakomba be Iziraela.

³²Pezhugwi kwa ikoku kose bakadwilila ngotjinya. Pezhugwi kwe makaabadzo e Ndzimu abazogalamoyo.

³³Ndizo wakathama kuti mazhuba abo apele se mfemo, ne makole abo abe mu lutjo.

³⁴Ndzimu wakati ubabulaya, bakaushaka, bakashandukila kuuli nge malebeswa.

³⁵Bakakumbulukigwa kuti Ndzimu ndiwo shongwe yabo, Ndzimu Upezhugwi zhugwi, ndzutunuli wabo.

³⁶Koga bakashaya lebeswa mu milomo yabo, bakaunyepela nge ndimi dzabo.

³⁷Mimoyo yabo inodudumwa nge kwawo, bakabe basina malebeswa mu tjidumano tjawo.

³⁸Ipapa iwo una ngoni, wakazwiibhatigwa matjinyo abo, ngono ukasibalobese, kanjinji wakazwidziba mu kugwadza moyo kwawo, ngono ukasimuse bushongola gwawo gose.

³⁹Wakakumbula kuti bani, koga ba nyama, bathu koga, phepo inopinda isingatjowoshanduka kakale.

⁴⁰Ndikanjinji seni beupandukila pakati kwe shango, kakale bakauhwisa zogwadza mu tjilambanyika!

⁴¹Bakalika Ndzimu bepaphulula kanjinji, beshongola N'yengemali we Iziraela.

⁴²Abazotongo kumbula simba lawo, kene zhuba lawakabadzutunula mu tjita.

⁴³Pawakalakidza zwilakidzo zwawo mu Egipiti, ne matjenamiso awo mu ntuthu we Zoani.

⁴⁴Wakashandula vula dze njizi dzabo dzikabe malopa, kuti ndizo basitongong'wa mu wobana dzabo.

⁴⁵Wakabatumila nlunda we thuzi, dzakabaluma ne mazhula, zwakabakolomola.

⁴⁶Zwiling'wa zwabo wakazwipa zwikonyana, ne zwizwalo zwazo zwikapiwa phashu.

⁴⁷Wakabulaya mizhambi yabo nge tjivulamabgwe, mipaya ukaibulaya nge makaa.

⁴⁸Wakabulaya ng'ombe dzabo nge tjivulamabgwe, wakalobesa zwithuwo zwabo nge vula.

⁴⁹Wakabaligila bushongola gunotjisa, bushongola ne kugwadzamoyo ne buyendasi, kuli batumwa be kudzimu banokolomola.

⁵⁰Wakathamila kugwadzamoyo kwawo zila, awuzobapitsha lufu, koga wakalonga butjilo gwabo mu magwadzi.

⁵¹Wakabulaya mbano dzose dze Egipiti bana be kutanga be simba le nthu mu mishasha ya Hamu.

⁵²Ndizo ukatungamila bathu bawo se pkhwizi, ukabatungamila mu tjilambanyika se zwithuwo.

⁵³Wakabatungamila, wakabatjengeta mu mbatsha, kuti ndizo basitje, koga gungwa gukakwididza zwita zwabo.

⁵⁴Wakabaswikisa ku duthu lawo lakayengemala, ku dombo lawazwitolela nge luboko gwawo gwe luji ngokunda.

⁵⁵Wakatata zwitjaba mbeli kwabo, wakabapa shango kube lukata gwabo, ukagadza njudzi dze Iziraela mu mizi yadzo.

⁵⁶Koga bakalika kakale bakapandukila Ndzimu Upezhugwi zhugwi, abazolondolodza ndayo dzawo,

⁵⁷bakashandukila ntome bakathama bupitipiti sa bobatategulu babo, basingagalikebgwe se dati lakapeyama.

⁵⁸Ngobe bakaukutha, bakaugwadzisamoyo nge magalo abo apezhugwi, bakaulonga fupa nge midzimwana yabo.

⁵⁹Ndzimu wakati uhwa, ukazhala bushongola, ukalasha Iziraela tjose.

⁶⁰Ukasiya bugalo gwawo guku Shilo, nshasha wawakabe ugala pakati kwe bathu.

⁶¹Ukayisa bhokisi le simba lawo ku busungwa, gudzo lawo ukaliyisa ku luboko gwe tjita.

⁶²Ukaletjedza bathu bawo kubulawa nge thumo, ukazhulila bushongola gwawo mu lukata gwawo.

⁶³Moto wakalotesa bazhuzha babo, baanadi babo bakasibe ne lumbo gwe ndobolo.

⁶⁴Bapirisiti babo bakabulawa nge bukanu, tjilikadzi dzabo dzikasitongobe mu tjililo.

⁶⁵Ndizo She bakamuka sebanomuka mu hwope, se mbayani wakasima ekuwa ngobe ang'wa nkumbi we zhambi.

⁶⁶Wakabgwiliza zwita zwawo shule, wakababhatisa shoni nge kusingapele.

⁶⁷Wakalamba nshasha wa Josefa, awuzoshalula ludzi gwa Ifureimi,

⁶⁸koga wakashalula ludzi gwa Juda, Dombo le Ziyoni, ilo launoda.

⁶⁹Wakabaka bugalo gwawo gwakayengemala gukanga mazhuzhugwi, se shango, iyo yawakathama kuti igale nge kusingapele.

⁷⁰Wakashalula nlanda wawo Dafite, wakantola ali mu matanga e pkhwizi,

⁷¹wakan'dusa mu kutjengeta pkhwizi zwele kuti abe nlisi we bathu bawo be ludzi gwa Jakubo, Baiziraela, lukata gwawo.

⁷²Wakabatjengeta nge moyo wakatambunuka, ngono wakabatungamila nge bunyambi gwe luboko gugwe.