Read Kalanga Njimbo 79 Bible Online

Njimbo 79 - Kalanga bible

Njimbo 79

¹Imwi Ndzimu, Bezwitjaba bakanginilila lukata gwenyu, bakatemapadza ng'umba yenyu yakayengemala, bakaliga Jerusalema ukabe matongo.

²Bakapa magola zwitumbu zwe balanda benyu kuti aje, bakapa zwibandana zwe shango nyama ye bayengemali benyu.

³Bakatebulila malopa abo pasi se vula, kupoteleka Jerusalema wose, ngono akuna wakababiganya.

⁴Tatjibe sapa mu babakidzani naswi, todadigwa tikasekwa nge bakatipoteleka.

⁵Apa kowodza kukabe lini Yahwe, makagwadzamoyo kene? Apa kowodza kukabe lini kene, bushongola gwenyu gowodwilila gupisa se moto?

⁶Delusilani bushongola gwenyu mu zwitjaba zwisingamuzibe, ne mu mibuso iyeyo isingadane zina lenyu.

⁷Ngobe bakalobesa Jakubo bakakolomola nzi uwe.

⁸Musititilike milandu yabo batategulu bedu, tjimbidzani mutihwile ngoni, ngobe takaisiwa pasi kwazo.

⁹Mutibhatshe, imwi Ndzimu we jidzo ledu, ngentha ye gudzo le zina lenyu, mutisunungule kakale mutizwiibhatigwe zwibi zwedu, ngentha ye zina lenyu.

¹⁰Ini zwitjaba zwingabhuzwa zwiti, “Ndzimu wabo ungayi kene?” Kubgwilizila kwe kutebugwa kwe malopa e balanda benyu ngakuzibgwe mu zwitjaba mbeli kwenyu.

¹¹Gomela kwe basungwa ngakuswike mu zebe dzenyu, nge simba lenyu bakililani ibabo bakasumikilisigwa lufu.

¹²Bgwilizilani katendeka babakidzani naswi, kugongobola kwabakamugongobola imwi She!

¹³Ndizo iswi bathu benyu, ngubi ye mafulo enyu, towomuboka nge kusingapele, kudwa mu tjizekugwana kunoti ku tjizekugwana, towoleba ngekwe kukudziwa kwenyu.