Read Kalanga Njimbo 80 Bible Online

Njimbo 80 - Kalanga bible

Njimbo 80

¹Teedzani, imwi nlisi we Iziraela. Imwi munotungamila Josefa se ngubi ye pkhwizi! Imwi mugele mu tjigalo tje bushe pakati kwe dzikherubhu, dwililani ngopenya,

²mbeli kwa Ifureimi na Bhenjamini na Manase! Lakidzani simba lenyu, ngono muzhe kowotitjidza!

³Mutibake imwi Ndzimu, penyesani buso gwenyu, kuti ndizo titjidziwe.

⁴Imwi Yahwe Ndzimu we mibunga, mowogwadzilamoyo mitembezelo ye bathu benyu kuswikila lini kene?

⁵Makabajisa tjiwunga nge mishodzi, mukabapa mishodzi kuti bang'we nge buzhalo.

⁶Motithama tikabe madado e babakidzani naswi, zwita zwedu zwikatiseka mahanya.

⁷Mutibake imwi Ndzimu we mibunga, mutipenyesele buso gwenyu, kuti titjidziwe.

⁸Makazhisa nzhambi kudwa ku Egipiti, makatata zwitjaba mu shango ngono mukaudzwala.

⁹Makakulila nzhambi lubazhe, midzi yawo ikangina pasi ngono ukazhala shango.

¹⁰Matombo akafukidzwa nge ntutshi wawo, miti ye misida ikafukidzwa nge thabi dzawo,

¹¹ikadusila thabi dzawo ku gungwa, thadzwana dzinothinila dzikaswika ku gwizi.

¹²Ini ngono makapkhwanya makuma awo, bapindi nge zila kwabanopinda betjela zhambi dzawo?

¹³Hwotji ye shango inoupulula, na zose zwinoyenda mu shango zouja.

¹⁴Tendebukilani ku tili, imwi Ndzimu we mibunga! Lingani pasi muli kudzimu mubone, ibeni nge hanya ngekwe nzhambi uwoyu.

¹⁵Iwo nti wakadzwagwa nge luboko gwenyu gwe luji.

¹⁶Nzhambi wenyu wakatemwa ukaligigwa pasi, wakapisiwa nge moto, dzene bangalobesiwa nge kutjemela kwenyu makashweshwanya phazha.

¹⁷Koga tjiazha tjenyu ngatjibe pezhugwi kwa ibabo baku luboko gwenyu gwe luji, tjaba yamakazwisimisila.

¹⁸Ndizo atingatjamufupatile kakale, mutipe butjilo, ngono towodana zina lenyu.

¹⁹Mutibake imwi Yahwe Ndzimu Masimbawose, penyesani buso gwenyu, kuti titjidziwe.