Read Kalanga Njimbo 81 Bible Online

Njimbo 81 - Kalanga bible

Njimbo 81

¹Mbilani pezhugwi, mumbile Ndzimu iwo simba ledu; pululudzilani Ndzimu wa Jakubo!

²Shobani lumbo, mulidze tjilidzo tje thamborini, lidzani tjilidzo tje laya ne dende kunozipa.

³Lidzani lunyanga mwedzi ugala, ne uyedzegwa, mu zhuba ledu le nzano.

⁴Ngekuti i ndayo mu Iziraela, ndayo ye Ndzimu wa Jakubo.

⁵Yawakalaya Josefa, paakabhuda mu shango ye Egipiti. Ndohwa hwi landisakatongoziba.

⁶“Ndakamutula ntolo mu mathudzi, amutula itundu mu misholo.

⁷Wakati uli mu kuhwazogwadza kukulu akudana, ngono ndakakuangula, ndakakudabila ndili mu kudidima kwe makole ndakakulika ku vula dze Meriba.

⁸Ihwani, imwi bathu bangu, ha ndimutjenjedza! Iwe Iziraela, ha wabe unganditeedza!

⁹Kusitongowanika ndzimu usingazibgwe mu muli, musitongonamata ndzimu upoga.

¹⁰Ndimi Yahwe Ndzimu wenyu, wakamudusa mu shango ye Egipiti. Ashama, ngono ndowokupashika.

¹¹“Koga bathu bangu abazoteedza hwi langu, Iziraela azotongobe ne tjimwe nami.

¹²Ndizo ndakabaletjedza nge moyo yabo mikukutu, kuti batobele njalakang'wa dzabo.

¹³Ha bathu bangu, babe banganditeedza, ha Iziraela abe angatobela zila dzangu,

¹⁴ndabe ndowotebamisa zwita zwabo tjinyolotjo, ndibe ndishandulila luboko gwangu ku banyanyayidzi babo!

¹⁵Ibabo banobenga Yahwe banowoshushubala bakabalinga, ngono bakalobgwa shamu nge kusingapele.

¹⁶Koga ndowomujisa korong mbuyanana kwazo, ndabe ndowomugutsha nge butji gwe nyutji, gunodwa mu shongwe.”