Read Kalanga Njimbo 84 Bible Online

Njimbo 84 - Kalanga bible

Njimbo 84

¹Bugalo gwenyu gwakanaka sene, imwi Yahwe we Mibunga!

²Meya yangu yakamushuba kwazo, inotshwigwa kubona magalo a Yahwe, moyo wangu ne meya yangu zombila Ndzimu nge shatho.

³Ne zhazho ina nzi, ne nyenganyenga inozwibakila shaka, paingagadza majindana ayo, pa zwibeso zwenyu, imwi Yahwe Masimbawose, Mambo wangu ne Ndzimu wangu.

⁴Bakakombolegwa ibabo banogala mu ng'umba yenyu, bemba bemukudza misi yose.

⁵Bakakombolegwa balume be simba labo limumuli, ibo bakazwimisila mu mimoyo yabo kutathila ku Ziyoni,

⁶sekwa kwabanopalama guku le Bhakha banolithama pathu pe misenya, vula dze nseulo na idzobo dzopafukidza nge madziba.

⁷Banodwilila besima, Ndzimu we midzimu unowobong'wa mu Ziyoni.

⁸Imwi Yahwe Ndzimu we mibunga, ihwani ntembezelo wangu, bhulutanani, imwi Ndzimu wa Jakubo!

⁹Bonani tjivikili tjedu, imwi Ndzimu, lingani mu buso gwe nzhodziwa wenyu.

¹⁰Ngobe zhuba ling'ompela mu ng'umba yenyu loyita, pa tjiwulu (1 000) pamwe pathu. Ndingabe ntjengeti we nkoba mu ng'umba ye Ndzimu wangu, pana kuti ndigale mu mishasha ye bubi.

¹¹Ngobe Yahwe Ndzimu i zhuba ne tjivikili, banokupa kuzwalana ne kuteta. Akuna tjakanaka Yahwe tjabanonyima ibabo banoyenda mu lebeswa.

¹²Imwi Yahwe Ndzimu Masimbawose, bakakombolegwa ibabo banogalabgwe mu muli.