Read Kalanga Njimbo 85 Bible Online

Njimbo 85 - Kalanga bible

Njimbo 85

¹Yahwe, makama ne shango yenyu, makabgwilizila Jakubo makombolelo.

²Makazwiibhatigwa bathu benyu milandu, makabazwiibhatigwa zwibi zwabo zose.

³Makashandukila bushongola gwenyu gose, mukashandukila kugwadzamoyo kwenyu kwakabe kupisa.

⁴Mutibake, imwi Ndzimu we jidzo ledu, muletjedze kusatishathila kwenyu.

⁵Apa mogwadzila moyo tjatjose kene? Apa bushongola gwenyu gowodwilila kunoti ku zwizekugwana zose kene?

⁶Apa amutowomusa kakale kene? Kuti ndizo bathu benyu bamushathile kene?

⁷Muti lakidze mahwilongoni enyu, imwi Yahwe, kakale mutipe jidzo lenyu.

⁸Ngandihwe kuti Ndzimu Yahwe banowolebani, ngobe banowoleba kunyalala mu bathu babo, ku bayengemali babo, kuna banoshandukila ku bali.

⁹Malebeswa jidzo lawo libe pejopejo na ibabo banoutja, kuti gudzo lawo ligale mu shango yedu.

¹⁰Ludo gusingazunguzike ne kugalikabgwe zwishangane, ndulamo ne kunyalala zwidziyisane.

¹¹Kugalikabgwe kowomela gudwa pasi, ngono ndulamo inowolinga pasi kudwa zhuzhugwi.

¹²Ee, Yahwe banowopa tjakanaka, ngono shango yedu inowowana zwizwalo zwakawanda.

¹³Ndulamo inowobatungamila, ibuya ibathamila mwazha pabanotshamba.