Read Kalanga Njimbo 86 Bible Online

Njimbo 86 - Kalanga bible

Njimbo 86

¹Zhulani zebe dzenyu, imwi Yahwe, mundidabile, ngobe ndi nshayi kakale ndi nsheti.

²Tjengetani butjilo gwangu, ngobe ndakadumila mu muli, tjidzani nlanda wenyu, unogalabgwe mu muli. Mu Ndzimu wangu.

³Ibeni ne ngoni mundili, imwi She, ngobe ndolilila kumuli zhuba lose.

⁴Shathisani meya ye nlanda wenyu, imwi She, ngobe ndomilidzila meya yangu pezhugwi, kumuli.

⁵Ngobe imwi, imwi She, makalulwama kakale mozwiibhatigwa, muzhele ludo gusingazunguzike muna bose banomudana.

⁶Zhulani zebe, imwi Yahwe, muhwe ntembezelo wangu. Teedzani tjililo ne kumbila kwangu.

⁷Mu nsi we kudziyidzika kwangu ndodana imwi, ngobe mondidabila.

⁸Akuna unonga imwi pakati kwe midzimu, imwi She, kene kuli mishingo inonga yenyu.

⁹Zwitjaba zose zwamakathama zowozha, zwikathigama mbeli kwenyu She, ngono zowokudza zina lenyu.

¹⁰Ngobe munkulukulu kakale mothama zwithu zwinotjenamisa, imwi moga mu Ndzimu.

¹¹Mundidiye zila yenyu, imwi Yahwe, kuti ndizo ndiyende mu lebeswa lenyu, mundipe moyo nng'ompela kuti nditete zina lenyu.

¹²Ndomuboka, imwi She Ndzimu wangu, nge moyo wangu wose, ndowokudza zina lenyu nge kusingapele kose.

¹³Ludo gwenyu gusingazunguzike bukulu seni mundili, makasunungula meya yangu mu bugalo gwe bafi.

¹⁴Banozwikudza bakandimukila, imwi Ndzimu, goko le basina ngoni lovima butjilo gwangu, ibo basina hanya namwi.

¹⁵Koga, imwi She, mu Ndzimu una ngoni ne lubu, amuto tjimbidza gwadzamoyo muzhele ludo gusingazunguzike ne kugalikabgwe.

¹⁶Shandukilani kundili mundihwile ngoni, ipani nlanda wenyu simba tjidzani nkololo we nlandakadzi wenyu.

¹⁷Mundilakidze tjilakidzo tje ndulamo yenyu, kuti ndizo zwita zwangu zwitjibone zwibhakhwe nge shoni, ngobe imwi Yahwe, makandibhatsha mukabuya mukandinyaladza.