Read Kalanga Njimbo 88 Bible Online

Njimbo 88 - Kalanga bible

Njimbo 88

¹Imwi Yahwe, Ndzimu we jidzo langu, ndolila ndili mbeli kwenyu siku ne sikati.

²Ndokumbila kuti ntembezelo wangu uzhe mbeli kwenyu, hwililani tjililo tjangu.

³Ngobe meya yangu izhele kudziyidzika, ne butjilo gwangu gosedzela ku gomba le lufu.

⁴Ndobaligwa muna ibabo banoyenda ku gomba le lufu. Ndonga nlume usina simba,

⁵ndonga ibabo bakalashigwa bapakati kwe bafi, ndonga bakabulawa balele mu zwikumbu, ndonga ibabo basingatjaalakane, ngobe bakathubugwa mu kuwana bhatsho yenyu.

⁶Makandibiga pasi pasi kwe gomba, mukatikati kwakati zwititi.

⁷Bushongola gwenyu gondilemela, kakale gondivuna mitshibha.

⁸Makathama kuti bakwinya bangu bandiambuke makandithama abe tjithu tjinobatjisa. Ndakabhatshigwa kuti ndizo ndisitongo pudzumuka.

⁹Mesho angu apofupadziwa nge buyendasi. Zhuba nge zhuba ndomudana, imwi Yahwe, ndosuka maboko anngu mbeli kwenyu.

¹⁰Apa moshingila bafi matjenamiso kene? Apa mitutshi inomilika kumukudza kene?

¹¹Apa ludo gwenyu gusingazunguzike golebgwa mu bugalo gwe bafi kene? Kene kugalikabgwe kwenyu kolebgwa mu gomba le golomodzo kene?

¹²Apa makaabadzo enyu anozibgwa mu zhalima, kene mishingo yenyu ye ndulamo inolebgwa ngekwayo mu shango ye kukanganika kene?

¹³Koga imi, imwi Yahwe, ndolilila kumuli, mangwanana ntembezelo wangu ndowoyisa mbeli kwenyu.

¹⁴Imwi Yahwe, apa ini mundilashila kutjena kene? Ini mundisumbikila buso gwenyu kene?

¹⁵Tjinga kudwa mu butjetjana gwangu ndili mu busungwa kakale ndili pejo nge lufu, ndakadziyidziwa nge kutjisa kwenyu ngono ndatjizwitoboka.

¹⁶Bushongola gwenyu gondikulila, kutjisa kwenyu kondikolomola.

¹⁷Zhuba lose zwakandipoteleka se nsundila zwakandifukidza.

¹⁸Makathama kuti bazwalani bangu bandiambuke, zhalima ndilo nzwalani wangu nkulu.