Read Kalanga Njimbo 89 Bible Online

Njimbo 89 - Kalanga bible

Njimbo 89

¹Ndowomba ngekwe ludo gwa Yahwe gusingazunguzike, nge nlomo wangu ndowoleba kugalikabgwe kwenyu ku zwizekugwana zose.

²Ndileba kuti ludo gwenyu gusingazunguzike gugelile tjose kugalikabgwe kwenyu kwakadzikila se zhuzhugwi.

³Makati, “Ndakathama tjidumano ne nshalugwa wangu, ndakatuna pa nlanda wangu Dafite nditi,

⁴‘Ndowobiga zwizekugwana zwizo nge kusingapele, kakale ndowobakila zwizekugwana zose tjigalo tje bushe.’ ”

⁵Zhuzhugwi ngakukudze matjenamiso enyu, imwi Yahwe, kugalikabgwe kwenyu ngakukudziwe mu gubungano le bayengemali.

⁶Apa ndiani uku makole ungafanidzanyiwa na Yahwe kene? Apa ndiani pakati kwe zwitjili zwe kudzimu unonga Yahwe kene?

⁷Ndzimu unotjiwa mu gubungano le bayengemali, nkulu kakale unotjisa kupinda bose bakaupoteleka.

⁸Imwi Yahwe Ndzimu we mibunga, apa ndiani una simba samwi, imwi Yahwe, ne kugalikabgwe kwenyu kwakamupoteleka kene?

⁹Molaula kodzongeka kuna masimba kwe gungwa; matuthu e vula ye gungwa aemiduka moadzikamisa.

¹⁰Makapkhwanya Rahabhu se ntumbu we phuka, makapaladza zwita zwenyu nge luboko gwenyu gwakasima.

¹¹Zhuzhugwi nde kwenyu, shango na iyo nde yenyu, shango yose na zose zwimuili ndimwi makazwithama,

¹²burwa ne bunandzwa makazwithama, Matombo e Tabhori ne Hemoni anomba akashathila zina lenyu.

¹³Luboko gwenyu guna simba gulu, kwakasima luboko gwenyu ne tjiazha tjenyu tje luji.

¹⁴Ndulamo ne kutambunuka ndizo thiwa dze tjigalo tjenyu tje bushe, ludo gwenyu gusingazunguzike ne kugalikabgwe makazwitungamidza.

¹⁵Bakakombolegwa ibabo banoziba mpululu we nzano, banoyenda mu tjedza tji mbeli kwenyu, imwi Yahwe.

¹⁶Banomilidza zina lenyu pezhugwi zhuba lose, bebuya bekudza ndulamo yenyu.

¹⁷Ngobe ndimwi gudzo le simba labo, nge bumilili gwenyu, lunyanga gwedu gwakamilidzigwa pezhugwi.

¹⁸Ngobe tjivikili tjedu ngetja Yahwe, Mambo wedu, N'yengemali we Iziraela.

¹⁹Ntolo makalebeleka nge mbono mukadwa Unogalikabgwe wenyu muti, “Ndakaambadza tjiala iye una masimba ndakamilidzila pezhugwi iye wandakashala mu bathu.

²⁰Ndakabona nlanda wangu Dafite, ndakanzhodza ne mafuta angu akayengemala.

²¹Kuti ndizo simba le tjiazha tjangu libe naye, luboko gwangu gonsimisa.

²²Tjita atjingankunde, mbi aangankulile.

²³Ndowopkhwanya zwita zwizwe mbeli kukwe, ndibuya ndilobesa ibabo banombenga.

²⁴Kugalikabgwe kwangu ne ludo gwangu gusingasingazunguzike zwibe naye, ngono lunyanga gugwe gowomilidzika mu zina langu.

²⁵Ndowobiga tjiazha tjitje pezhugwi kwe gungwa, ne luboko gugwe gwe luji pezhugwi kwe njizi.

²⁶Unowondililila eti, ‘Mu tate bangu, Ndzimu wangu, kakale Shongwe ye jidzo langu!’

²⁷Ndowonthama mbano yangu, upezhugwi kwa bomambo be shango.

²⁸Ndowombiganyila ludo gwangu gusingazunguzike nge kusingapele, ne tjidumano tjangu naye atjitozunguzika.

²⁹Ndowobiga ludzi gugwe nge kusingapele, ne tjigalo tjitje tje bushe se mazhuba e kudzimu.

³⁰Ha bana babe bangalasha nlayo wangu, kakale basingatobele milayo yangu,

³¹ha betjuluka ndaulo dzangu, ngono basingalondolodze milayo yangu,

³²ndizo ndowobaloba shamu ngekwe matjinyo abo, ne milandu yabo ndowobahwisila iyo zogwadza.

³³Koga anditowo tothodza ludo gwangu gusingazunguzike munli, kene kuli kubashayila lebeswa mu kugalikabgwe kwangu.

³⁴Anditowo shandukila tjidumano tjangu, kene kushandula dama labhuda mu nlomo wangu.

³⁵Ndatuna gwe kutanga kakale kuli kwe bupelo nge buyengemali gwangu, anditowonyepela Dafite.

³⁶Lutshinga gugwe gowodwilila nge kusingapele, ne tjigalo tjitje tje bushe tjowogalila tjose mbeli kwangu se zhuba.

³⁷Tjowobigwa nge kusingapele se mwedzi, se ntendeki we malebeswa ku makole.”

³⁸Koga ngwenu manshandukila mukanlamba, muzhele bushongola ngekwe nzhodziwa wenyu.

³⁹Mazwilandula tjidumano tjenyu ne nlanda wenyu, makabumbuludza tjiala tjitje mu hwuluba.

⁴⁰Manginilila makuma awe wose mupkhwanya, mukasiya matizhilo awe ali matongo.

⁴¹Bose banopinda ndipapo banonkwibila, watjibe madado mu babakidzani naye.

⁴²Makamilidza luboko gwe luji gwe zwita zwizwe, mukashathisa zwita zwizwe zose.

⁴³Makapumisa bukano gugwe, kakale amuzoma naye mu ngwa.

⁴⁴Makantolela swimbo ye bushe mu luboko gugwe, mukaposela pasi tjigalo tjitje tje bushe.

⁴⁵Makatapudza mazhuba awe e butjetjana, makambhatisa shoni.

⁴⁶Kowodza kukabe lini, imwi Yahwe? Apa mowozwisumbika tjatjose kene? Apa kodza kukabe lini bushongola gwenyu gothuta se moto kene?

⁴⁷Kumbulani kuti butjilo gwangu gufupi tjini, ngobe tjamakabumbila bakololo be bathu masimba malashe!

⁴⁸Apa ndiupi nthu ungatjila kasife kene? Ndiani ungazwitjidza mu simba le gomba le lufu kene?

⁴⁹She, ludo gwenyu gusingazunguzike gwa ntolo gungayi kene, igo gwamakatuna ndigo kuna Dafite nge kugalikabgwe kwenyu?

⁵⁰Kumbulani, imwi She, kuti nlanda wenyu wadadigwa tjini, sekwa ndinodzikitadzila masapa anodwa mu bathu,

⁵¹andinotukwa nge zwita zwenyu, imwi Yahwe, abakatuka papinda nzhodziwa wenyu ndiwo.

⁵²Kukudziwe Yahwe nge kusingapele kose. Ngakujalo kakale Ngakujalo.