Read Kalanga Njimbo 9 Bible Online

Njimbo 9 - Kalanga bible

Njimbo 9

¹Ndowokudza Yahwe nge moyo wangu wose ndowoleba ngekwe mishingo yenyu yose inotjenamisa!

²Ndowoshatha apembela nge kwenyu, Ndowomba njimbo dzinokudza zina lenyu imwi mu Pezhugwi zhugwi.

³Zwita zwangu zowoti zwishanduka, zwikakuthiwa zwikaloba mbeli kwenyu.

⁴Ngoti malakidza kutambunuka kwangu, mukagala tjigalo tjenyu tje bushe mukasumikilisa nge ndulamo.

⁵Makatjemela zwitjaba, mukalobesa babi, mukabukusha mazina abo tjose.

⁶Zwita azwitjipo, makakolomodza mizi yazo yabe matongo, abatowotjaalakang'wa kakale.

⁷Koga Yahwe banobusa nge kusingapele, bakalulwamisila tjigalo tjabo tje bushe kusumikilisa.

⁸Banosumikilisa shango nge ndulamo, banolaula njudzi nge ndulamo.

⁹Yahwe i dizhilo le bakatshambilidziwa, i dizhilo lakasima mu misi ye manikano.

¹⁰Ibabo banoziba zina lenyu banogalabgwe mu muli. Ngobe Yahwe, amutolasha banomushaka!

¹¹Mbilani Yahwe njimbo dzinokudza, ibo banobusa mu Ziyoni, budzani njudzi mishingo yabo.

¹²Ngoti Ndzimu unobgwilizila lopa latebugwa unobakumbula, abatokangang'wa tjililo tje banodziyidziwa.

¹³Ibeni nge ngoni mu ndili Yahwe! Bonani sekwandinodziyidziwa nge bakandibenga, imwi munondimilidza kudwa mu mikoba ye lufu,

¹⁴kuti ndizo ndilebe ngekwe gudzo lenyu pa mikoba ye Nkololokadzi we Ziyoni, ndishathe mu jidzo lenyu.

¹⁵Zwitjaba zwakawila mu gomba lazwakatsha. Makumbo abo akabhakhwa nge gwanga gwabakateya ibo zwabo!

¹⁶Yahwe banozibika nge kusumikilisa kwabo nge ndulamo. Babi bakabhatshigwa nge mishingo ye maboko abo.

¹⁷Bhelelo le babi bugalo gwe bafi, zose zwitjaba zwinokangang'wa Ndzimu.

¹⁸Basheti abatowokanganika misi yose, ne kugalabgwe kwe bashayi akungabalashikile tjose.

¹⁹Milikani Yahwe! Musiletje bathu bakamukunda, zwitjaba ngazwisumikilisiwe mbeli kwenyu!

²⁰Mubatjise Yahwe, zibisani zwitjaba kuti zwibathu koga!