Read Kalanga Njimbo 92 Bible Online

Njimbo 92 - Kalanga bible

Njimbo 92

¹Kwakanaka kutenda Yahwe, ne kumba njimbo dzinokudza zina lenyu, imwi mu pezhugwi zhugwi.

²Kuleba ngekwe ludo gwenyu gusingazunguzike mangwanana, nenge kugalikabgwe kwenyu kuli busiku,

³kulidza tjilidzo tje misungo ne dende, ne nlidzo we tjilidzo tje laya.

⁴Ngobe imwi Yahwe, mandishathisa nge nshingo wenyu, ndomba nge shatho ndimbila mishingo ye maboko enyu.

⁵Mishingo yenyu mikulu seni, imwi Yahwe! Njalakang'wa dzenyu dzimukatikati!

⁶Tjimata atjingazibe, tjilengwe atjingahwisise woku:

⁷Kuti nenguba babi betutuma se dishwa ne bashingi be mbipo benaka, bakalingisana nge golomodzo nge kusingapele.

⁸Koga imwi Yahwe, mu pezhugwi nge kusingapele.

⁹Ngobe zwita zwenyu, imwi Yahwe, tjoselele zwita zwenyu zowoloba, bose bashingi be mbipo banowopaladziwa.

¹⁰Koga makamilidza lunyanga gwangu se gwe phofu. Makandizhodza mafuta matshwa.

¹¹Mesho angu akabona kukundiwa kwe zwita zwangu. Zebe dzangu dzakahwa phipiti ye zwita zwangu.

¹²Balulwami banonaka se nlala, kakale banokula se miti ye misida ye Lebanoni.

¹³Bakadzwagwa mu Ng'umba ya Yahwe, banokula mu misha ye Ndzimu wedu.

¹⁴Mu bukwegu gwabo batjina mitjelo, banogala bekwidzima kakale bakasima.

¹⁵Kulakidza kuti Yahwe bakatambunuka, ndibo shongwe yangu, kakale akuna mbipo mu bali.