Read Kalanga Njimbo 94 Bible Online

Njimbo 94 - Kalanga bible

Njimbo 94

¹Imwi Yahwe, imwi Ndzimu we mbuzuludzo, imwi Ndzimu we mbuzuludzo, dwililani ngopenya!

²Milikani, imwi nsumikilisi we shango, ipani banozwikudza tjakabafanila!

³Imwi Yahwe, kowodza kukabe lini babi, apa kowodza kukabe lini babi bekholisa kene?

⁴Matama e mazwikudzo anotebuka mu milomo yabo bose bashingi be bubi banozwikukumadza.

⁵Banopkhwanya bathu benyu, imwi Yahwe! Banotshambilidza lukata gwenyu.

⁶Banobulaya tjilikadzi ne nzhi, banobulaya siyang'wa.

⁷Ngono banoti, “Yahwe abatobona, Ndzimu wa Jakubo autobonesesa.”

⁸Hwisisa iwe tjilengwe tjinopinda bathu bose, zwilengwe, apa mowotjenjela lini kene?

⁹Apa iye wakathama zebe aatohwa kene? Iye wakabumba zhisho, aatobona kene?

¹⁰Iye unolaya zwitjaba, iye unodiya bathu luzibo, apa aatotjemela kene?

¹¹Yahwe banoziba njalakang'wa dze bathu, kuti iphepo isina tjayakasenga.

¹²Bakashatha ibabo bamunolaya, imwi Yahwe, ne mubadiya mu nlayo wenyu.

¹³Mubanyalulusa kudwa mu mazhuba e kudziyidzika, kuswikila gomba litshigwa babi.

¹⁴Ngobe Yahwe abangalashe bathu babo, abatowolasha lukata gwabo,

¹⁵Ngobe ndulamo inowobgwilila ku balulwami ndizo bose bakatambunuka mu moyo banowoitobela.

¹⁶Apa ndiani unoma nami mu babi kene? Apa ndiani unondimila mu bashingi be bubi kene?

¹⁷Ha Yahwe babe basandibhatsha meya yangu inobe yalibilidzila kunogala mu shango yakanyalala.

¹⁸Ndakati ndialakana kuti, “Gumbo langu lotelela,” Ludo gwenyu gusingazunguzike, imwi Yahwe, gwakandisimisa.

¹⁹Ha njemulo dze moyo wangu dzili njinji, nyaladzo yenyu inoshathisa meya yangu.

²⁰Apa babusi babi bangashingidzana namwi kene, ibabo banothama mbipo nge kukombamisa nlayo?

²¹Banoshangana beluka gwanga ngekwe balulwami, kakale banosumikilisa bathu lufu basina nlandu.

²²Koga Yahwe batjibe dizhilo langu, kakale Ndzimu wangu shongwe ye dizhilo langu.

²³Banowopa babi mbayilo we bubi gwabo, banowobalashila kutjena nge zila ye bubi gwabo, Yahwe Ndzimu wedu unowobatshwayila.