Read Kalanga Makungulupeswa 1 Bible Online

Makungulupeswa 1 - Kalanga bible

Makungulupeswa 1

¹ Makungulupeswa a Solomoni, nkololo wa Dafite, mambo we Iziraela,

²anodiya butjenjedu ne matama e ndayo, ekuhwisisa matama e ndingisiso,

³ne kuamutjila nlayo kunotjenjedza, kuthama kululwama ne kutambunuka ne kusa shalaula,

⁴kupa basina luzibo butjenjedu, kupa luzibo ne njele ku batjetjana,

⁵ntjenjedu unohwa kapapha kudiyika kukwe, una hwisiso kapapha bunyambi gugwe,

⁶kuhwisisa gungulupeswa ne zwifano, matama e batjenjedu ne mabatsho abo.

⁷Kutja Yahwe ndiko kutangisa kwe luzibo, zwilengwe zolingila pasi butjenjedu ne ndayo.

⁸Nkololo wangu, teedza ndayo dza tate babo, usilashe zwidiyo zwa mmeyabo,

⁹ngobe zowobe tjiala mu nsholo uwo, ne ndalama mu ntshibha uwo.

¹⁰Nkololo wangu, ha batjinyi bekutjengedza, usitongo duma.

¹¹Ha beti, “Ngati yende tose, tilalile nthu titebule lopa, tinyange tibhate usina nlandu,

¹²se ikumbu ngati bamidzeni bali bapenyu, bali bapumbulu, sa ibabo banolongwa mu gomba,

¹³towowana fumwa inoguta, tikazhadza ng'umba dzedu ne zwatinowotapa,

¹⁴iwe ibe mmwe wedu, tibe ne hwomwana ing'ompela.”

¹⁵Nkololo wangu, usitongo yenda zila nabo, dziba gumbo lilo kuyenda mu zila dzabo,

¹⁶ngobe makumbo abo anotjimbidzo tizhila ku bubi, kakale banotjimbidzo kutebula lopa.

¹⁷Akutobhatsha tjimwe kuteya nyuni yakakulinga,

¹⁸koga bathu ibaba banolalila lopa labo, bakalalila butjilo gwabo.

¹⁹Ndiyo zila ya bose banowana fumwa nge phipiti, inotolela bathu butjilo gwabo.

²⁰Butjenjedu gomimilila pezhugwi mu dzizila, mu matengeselo gomilidza hwi lago,

²¹pezhugwi kwe makuma gomimilila pezhugwi, pa mikoba ye nzi nkulu golebeleka guti,

²²“Kowodzina kukabe lini, imwi basina mano, muda kusabe ne mano? Kowodzina kukabe lini badadi bedada beshathila kudada kwabo ne zwilengwe zwibenga luzibo?

²³Shandukani ha ndimutjemela, bonani, ndowodila meya yangu mu muli, ndowothama kuti matama angu muazibe.

²⁴Nekuti ndakamudana mukasinditeedze, ndikatambunudza luboko gwangu mukasibe ne hanya,

²⁵mukasibe ne hanya ne gumbuludzo langu, mukasibe ne tjimwe ngotjemela kwangu,

²⁶namibo ndowomuseka mu mbhatsha dzenyu, ndowomuseka mahanya ha kutja kwenyu kwamuswikila,

²⁷ha kutja kumuwila se dutu, ne mbhatsha dzenyu kumuzhila se tjampupudze, ha buyendasi ne manikano zwimuwila.

²⁸Ipapo banowondidana, koga anditowodabila, banowondishaka bakalonga meya mu nyama koga abatowondiwana.

²⁹Ngoti bakabenga luzibo kakale bakasishalule kutja Yahwe,

³⁰bakasibe ne hanya ne gumbuludzo langu, bakalingila pasi kutjemela kwangu kose,

³¹ndizo banowovuna tjabakadzwala mu zila dzabo kakale bakagutshiwa ne butjakwani gwabo.

³²Ngoti basina mano banobulawa ngopambuka kwabo, kusabe ne hanya kwe zwilengwe kozwipaladza,

³³koga iye unonditeedza unowogala akabakililika, unowogala asakabiga asingatje mbipo.”