Read Kalanga Makungulupeswa 10 Bible Online

Makungulupeswa 10 - Kalanga bible

Makungulupeswa 10

¹Makungulupeswa a Solomoni. Nkololo wakatjenjela unoshathisa tate babe, koga nkololo we tjilengwe unolonga mayi buyendasi.

²Fumwa inowang'wa nge bupitipiti aitobuzila, koga ndulamo inosunungula mu lufu.

³Yahwe abatoletjedza balulwami bebhakhwa nge zhala, koga banodziba njemulo dze babi.

⁴Luboko gwe simbe gozwala bushayi, koga luboko gwe una majatu gofumisa.

⁵Nkololo unovuna mu zhizha wakatjenjela, koga nkololo unoyizela mu zhizha unobhatisa shoni.

⁶Makombolelo amu nsholo we wakalulwama, koga nlomo we mbiimbi unosumbika phipiti.

⁷Njalakang'wa dze nlulwami makombolelo, koga zina le mbiimbi lowobola.

⁸Una moyo wakatjenjela unowoamutjila milayo koga tjilengwe tjinolebanya tjowokolomogwa.

⁹Iye unoyenda nge zila ina gudzo unowoyenda zubuyanana, koga iye unoyenda zila dzakakombama unowodusigwa patjena.

¹⁰Iye unovuna zhisho unozhisa mang'oni, koga iye unotjemela akatambunuka unozhisa mbakiso.

¹¹Nlomo we nlulwami nsenya we butjilo, koga nlomo we mbiimbi unosumbika phipiti.

¹²Benga komusa ngwa, koga ludo gozwimba milandu yose.

¹³Pa milomo yaiye una hwisiso kowanika butjenjedu, koga shamu yakafanila usakatjenjela.

¹⁴Batjenjedu banokubunganya luzibo, koga kubalabala kwe tjilengwe kodana kuloba.

¹⁵Fumwa ye mfumi ndiwo nzi uwe nkulu wakasima, bushayi gwe bashayi ndigo kuloba kwabo.

¹⁶Mbhailo we nlulwami unoyisa ku butjilo, koga mbuyilo ye mbiimbi inokwebela ku tjibi.

¹⁷Iye unoteedza ndayo umu zila ye butjilo, koga iye unolamba tjemegwa unolashika.

¹⁸Iye unobenga esumbika unonyepa, ne unotjinya bamwe mazina tjilengwe.

¹⁹Pana matama manji tjibi atjitoshayika, koga iye unozwibhata nlomo wakatjenjela.

²⁰Lulimi gwe nlulwani i siliva yakashalugwa, nkumbulo we mbiimbi auna bhatsho.

²¹Milomo ye nlulwami inojisa banjinji, koga zwilengwe zofa ngoshaya nkumbulo.

²²Makombolelo a Yahwe anofumisa, ngono abatoapaphidza nge buyendasi.

²³Kutjinya ku tjilengwe konga nzano, koga mazwibhato mabuya lushatho ku nthu una kuhwisisa.

²⁴Zwinotjiwa nge mbiimbi ndizo zwinon'wila, koga tjinoyemugwa nge balulwami banowotjipiwa.

²⁵Tjampupudze ha tjipinda, mbiimbi aatjipo, koga nlulwami wakathumbila kusingapele.

²⁶Se kunothama nkumbi wakatyorowa ku meno ne busi ku mesho, ndiko kunothama simbe kuna banoyituma.

²⁷Kutja Yahwe kopaphidza butjilo, koga makole e mbiimbi anowobe mashomana.

²⁸Galabgwe kwe balulwami lushatho, koga zwakalindigwa nge babi azwitoshingikala.

²⁹Yahwe i dizhilo kunawakatambunuka, koga bagolomodzo ku bathami be mbipo.

³⁰Balulwami abatowofa batshedugwa, koga babi abatowogala muna iyeyi shango.

³¹Nlomo we nlulwami unozhisa butjenjedu, koga lulimi gwakaleleka gowothubugwa.

³²Milomo ye nlulwami inoziba tjinoamutjilika, koga nlomo we mbiimbi unoziba tjakaleleka.