Read Kalanga Makungulupeswa 11 Bible Online

Makungulupeswa 11 - Kalanga bible

Makungulupeswa 11

¹Tjiyelo tje manyepkhwa tjoshimisa kuna Yahwe, ikale tjakatambunuka tjo bashathisa.

²Ha mazwikudzo ezha, kudwapo kozha mabhatisashoni, koga muna banozwiyisa pasi kuna butjenjedu.

³Gudzo le bakalulwama lobatungamila, koga bupitipiti gwe basakalulwama gobabulaya.

⁴Fumwa aitobhatsha ne tjimwe zhuba le bushongola, koga ndulamo inosunungula nthu mu lufu.

⁵Ndulamo ye usina nlandu inotambunudza zila iye, koga mbiimbi unokonesiwa nge bubi gugwe.

⁶Ndulamo ye bakatambunuka inobasunungula, koga basakalulwama banobhatshigwa nge bubi gwabo.

⁷Nthu mbi ha efa, kugalamoyo kopalala, ne njemulo dze fumwa dze basina ndzimu dzopela.

⁸Nlulwami unosunugwa mu mango'ni, kukangina mbiimbi muali.

⁹Ngo nyeya kukwe nthu mbi unotjinyidzila waagelidzane naye, koga wakalulwama unotjidziwa nge luzibo.

¹⁰Ha balulwami bakadwililambeli, ntuthu unoshatha, ngono ha babi bekolomoka bathu banopululudza.

¹¹Makombolelo e balulwami anokudza nzi nkulu, koga milomo ye babi inowukolomodza.

¹²Iye unolingila pasi mbakisani naye aana nkumbulo, koga nthu unohwisisa unozwinyalalila.

¹³Nzwina bung'wa unoyenda elebanya unodusa zwikowa, koga iye unogalikabgwe mu meya unozwibiga mu moyo uwe.

¹⁴Pasina gumbuludzo, bathu banowa, koga pana bakumbuludzi banjinji kuna mbakililo.

¹⁵Iye unozwisungila ntaya unowozwibona ne kwako, koga iye unobenga kwakajalo wakasununguka.

¹⁶Nkadzi unolemedzeka una gudzo, koga balume bakasima bawowana fumwa.

¹⁷Nthu una meya yakanaka unobuyigwa, koga nthu nkukutu unozwilonga mu mbatsha.

¹⁸Nthu mbiimbi unowana mbayilo unotjebela, koga nthu uno dzwala kwakatambunuka unovuna kwe malebeswa.

¹⁹Iye wakalulwama kwe malebeswa unowotjila, koga iye unotobela bubi unowofa.

²⁰Bathu be mikumbulo yakaleleka banoshimisa kuna Yahwe, koga ibo basina nlandu banobashathisa.

²¹Zibani kuti, nthu mbi haanga letjiwe koga asalobgwa shamu, koga ibo bakalulwama banowosunungugwa.

²²Se rin'gi ye golide yakalongwa mu tjimilo tje hwotji, konga nkadzi wakanaka asina nkumbulo.

²³Zwinoyemugwa nge balulwami zopelela zwili zwibuya, koga zwinoyemugwa nge batjinyi zopelela zwisiyizo.

²⁴Umwe nthu unopa akatambunudza luboko, unofumila mbeli, mmwe unotjiba zwaakafanila pa bamwe, unoshayila tjose.

²⁵Nthu una lubu unowofuma, naiye unodilidzila unowodilidzigwa.

²⁶Bathu balonga bhiso nthu unotjiba mathunde, koga makombolelo amu nsholo we unoatengesa.

²⁷Iye una moyonlefu wekushaka bubuya unoshaka gudzo, koga bubi gozha kuna iye unoguvima.

²⁸Iye unogalabgwe mu fumwa iye unowowa, koga nlulwami unowopasula se zhani bgwelele.

²⁹Iye unodziidza be nsha uwe unowothuwa lifa phepo, ne tjilengwe tjowobe nlanda ku ntjenjedu.

³⁰Ntjelo we nlulwami nti we butjilo, koga kusabe ne nlayo kobulaya.

³¹Ha nlulwami epiwa mbhailo uwe mu shango, mbiimbi ne ntjinyi koying'wi nge kukwe!