Read Kalanga Makungulupeswa 12 Bible Online

Makungulupeswa 12 - Kalanga bible

Makungulupeswa 12

¹Unoda kutjemegwa unoda luzibo, koga iye usingade kutjemegwa tjilengwe.

²Nthu wakalulwama unohwigwa ngoni ndi Yahwe, koga banolobesa nthu una mano akabipa.

³Nthu aatothumbidziwa nge bubi, koga ndzi we nlulwami aungadzikunugwe.

⁴Nkadzi wakalulwama tjiala tje nlume uwe, koga iye unobhatisa shoni unonga kubola kumu mafupa awe.

⁵Njalakang'wa dze balulwami dzakatambunuka, ngono mano e babi anotjebela.

⁶Matama e nthu mbiimbi anonga dati, koga nlomo we nlulwami unosunungula bathu.

⁷Bathu babi banokolomodzwa bakasala basitjipo, koga ng'umba ye balulwami inowoma.

⁸Nthu unolumbidziwa kuyendidzana ne nkumbulo uwe wakanaka, koga una nkumbulo wakaleleka unolingigwa pasi.

⁹Kuyita nlume unozwiyisa pasi kakale ezwishingila, pana una mazwikudzo ngono kusina tjaanoja.

¹⁰Nlulwami una anya nge butjilo gwe ithuwo tjitje, koga ngoni dze nthu mbi bukukutu.

¹¹Iye unolima nnda unowopokonyola zwijo, koga iye unotatana ne zwisina nshingo aana nkumbulo.

¹²Nthu mbiimbi unoyemula zwakabipa, koga ndzi we nlulwami una mitjelo.

¹³Nthu mbi unoteyiwa nge matama awe, koga nlulwami unoleya mbatsha.

¹⁴Nthu unogutshiwa ne matama aanoleba, koga tjashingwa nge maboko e nthu tjobuya kunli.

¹⁵Zila ye tjilengwe yakalulwama mu mesho atjo, koga nthu wakatjenjela unoamutjila gumbuludzo.

¹⁶Kugwadza moyo kwe tjilengwe ko zwilakidza tjinyolotjo, koga ntjenjedu aana anya ne sapa.

¹⁷Iye unoleba malebeswa unopa butendeki gwakatjena, koga ntendeki we manyepkhwa unotjebela

¹⁸Kuna nthu we matama mabi anobhaya se nsebe, koga lulimi gwe ntjenjedu go zhisa bhodzo.

¹⁹Milomo ina lebeswa inogalila tjose, koga lulimi guna manyepkhwa agutoyisa kumwe.

²⁰Kutjebela kumu mimoyo ye banoluka bubi, be mano mabuya bana shatho.

²¹Akuna tjakabipa tjinowila balulwami, koga bathu babi bakaambala mbatsha.

²²Milomo inonyepa inoshimisa kuna Yahwe, koga ibabo banoshinga nge lebeswa banobashathisa.

²³Nthu wakatjenjela unosumbika luzibo gugwe, koga tjilengwe tjotjimbidza lakidza bulengwe gwatjo.

²⁴Luboko gwe wakalonga mu nyama gowobusa, koga simbe iyo inowobe nlanda.

²⁵Bilibindana kwe moyo konyadza nthu meya, koga dama buya lonshathisa.

²⁶Nlulwami unotizhila bubi kule, koga zila dze bakaipa dzobakwebela ntome.

²⁷Nthu we simbe aangabhate phuka yaamusa, koga nthu wakalonga meya mu nyama unowowana fumwa isi fumwa.

²⁸Mu zila ye bululwami kuna butjilo, koga zila isiiyo inokwebela ku lufu.