Read Kalanga Makungulupeswa 13 Bible Online

Makungulupeswa 13 - Kalanga bible

Makungulupeswa 13

¹Nkololo wakatjenjela unohwa ndayo ya tate babe, koga ndadi aatotjemeleka.

²Nthu unoja zwakanaka zwe mitjelo ye nlomo uwe, koga njemulo dze bakaipa iphipiti.

³Iye unotjengeta nlomo uwe unotjengeta butjilo gugwe, iye unolebanya unozwikolomodza.

⁴Simbe inoyemula, ngono akuna tjainowana, koga njemulo dze wakalonga meya mu nyama dzozhadzisika.

⁵Nlulwami unoshima manyepkhwa, koga nthu mbi unobhatisa shoni.

⁶Bululwami gotjengeta iye una zila yakatambunuka, koga tjibi tjo labhulila kutjena mbiimbi.

⁷Mmwe nthu unozwithama wakafuma, koga aanatjaanatjo, mmwe unozwithama nshayi, koga ana fumwa njinji.

⁸Butjilo gwe nthu godzutunugwa nge fumwa iye, koga nthu we nshayi aana tjingandzutunula.

⁹Tjedza tje nlulwami tjopenyelela, koga luvone gwe mbiimbi gowodzima.

¹⁰Kuzwikudza kozhisa kukangazhana, koga butjenjedu gumuna banoamutjila gumbuludzo.

¹¹Fumwa yakawang'wa nge phupu inowopalala, koga iye unoshaba kushomanana ne kushomanana unoipaphidza.

¹²Tjakalindigwa kubepo ha tjinonoka tjonyadza meya, koga tjakalindigwa ha tjaboneka nti we butjilo.

¹³Iye unolingila dama pasi unozwibulaya, koga iye unoteedza nlayo unowowana mbhayilo uwe.

¹⁴Tjidiyo tje ntjenjedu nsenya we butjilo, kuti nthu aleye mapuzhu e lufu.

¹⁵Nkumbulo wakanaka unozhisa kudiwa nge bathu, koga zila ye basinga galemoyo ihukutu.

¹⁶Mu tjimwe ne tjimwe ntjenjedu unoshinga nge luzibo, koga tjilengwe tjolakidza bulengwe gwatjo.

¹⁷Ntumwa mbi unolonga bathu mu mbatsha, koga mmilili unogalikabgwe unozhisa bhodzo.

¹⁸Bushayi ne kulengudzika zozha kuna iye unolamba kulayiwa, koga iye unotjemegwa kahwa unokudziwa.

¹⁹Njemulo dzazhadzisika dzozipila meya, koga kushandukila bubi koshimisa ku zwilengwe.

²⁰Iye unoyenda ne bathu bakatjenjela unotjenjelabo, koga nkwinya we zwilengwe unowongina mu mbatsha.

²¹Mbatsha dzotobelela batjinyi, koga kubhudilila mbhayilo we balulwami.

²²Nthu wakalulwama unosiyila bana be bana babe lukata, koga fumwa ye nthu mbi yakabigigwa balulwami.

²³Gula le nshayi lina zojiwa zwinjinji, koga lopaladziwa nge kusatambunuka.

²⁴Iye usingashingise shamu unobenga nkololo uwe, koga iye unon'da unolonga meya mu nyama kunlaya.

²⁵Nlulwami una zojiwa zwakalizana kun'gutsha, koga ntumbu we nthu mbi unolila zhala.