Read Kalanga Makungulupeswa 14 Bible Online

Makungulupeswa 14 - Kalanga bible

Makungulupeswa 14

¹Butjenjedu gobaka ng'umba yago, koga bulengwe ne maboko ago gukaikolomola,

²Iye unoyenda nge thambunuko unotja Yahwe, koga iye we zila dzakamonana unobalingila pasi.

³Ndebo dze tjilengwe dzotjizhisila shamu mu ikamba tjatjo, koga milomo ye batjenjedu inowobabakilila.

⁴Pasina ng'ombe akuna mathunde, koga mathunde manji anozhisiwa nge simba le ng'ombe.

⁵Ntendeki unogalikabwe aatonyepa, koga ntendeki we manyepkhwa unofema manyepkhwa.

⁶Ndadi unoshakila butjenjedu suli, koga luzibo gotjimbidza wanika ku nthu unohwisisa.

⁷Thubukana ne tjilengwe, ngobe atjina luzibo gwatjinga kupa.

⁸Butjenjedu gwe wakatjenjela wulingisisa zila iye, koga bulengwe gwe zwilengwe hwutjebela.

⁹Ndzimu unoshima bathu babi, koga unoda bakalulwama.

¹⁰Moyo unoziba kugwadziwa kwawo, kakale akuna wakashanganyila shatho nawo.

¹¹Ng'umba ye babi inowokolomogwa, koga nshasha we bakatambunuka unowobhudilila.

¹²Kuna zila inolingika yakatambunuka ku nthu, koga bhelelo layo i zila ye lufu.

¹³Moyo unohwa zogwadza ne mu tjiseko ne bhelelo le shatho tjililo.

¹⁴Nthu we meya mibi unogutshiwa nge mitjelo ye zwiyito zwizwe, nlulwami naiye unogutshiwa nge mitjelo ye mishingo iye.

¹⁵Tjilengwe tjoduma tjimwe ne tjimwe, koga ntjenjedu unolinga kwaanoyenda.

¹⁶Ntjenjedu unotja zwakabipa ebe ezwileya, koga tjilengwe tjopaparika atjina njele.

¹⁷Nthu una moywana unotjimbidza ayita zwithu nge bulengwe, koga nthu unoluka mano mabi unobengwa.

¹⁸Zwilengwe zowana thaka ye bulengwe, koga bakatjenjela banoambadzwa tjiala tje luzibo.

¹⁹Bathu babi banothigama mbeli kwe balulwami, babi banothigama pa mikoba ye mizi ye bakalulwama.

²⁰Nshayi aatodiwa nenge mbakidzani naye dumbu, koga nfumi una bazwalani basi bashoma.

²¹Iye unolingila pasi mbakidzani naye ntjinyi, koga una ludo mu bashayi una kushatha.

²²Ibo banoluka mano akabipa abatolashika kene? Ibabo banoluka mano mabuya banogalikabgwe.

²³Kushinga kwazo kose kuna mbayilo, koga balabala nge nlomo koyisa ku bushayi.

²⁴Tjiala tje bakatjenjela butjenjedu gwabo, koga mbuyilo ye zwilengwe bulengwe gwazo.

²⁵Ntendeki we malebeswa unotjidza bathu, koga unoleba manyepkhwa ntjebeli.

²⁶Mu kutja Yahwe nthu una kugalabgwe kwakasima, ne bana babe banowobe ne dizhilo.

²⁷Kutja Yahwe nsenya we butjilo, kuti nthu aleye dati le lufu.

²⁸Bukulu gwa Mambo goboneka nge bunjinji gwe bathu, koga pasina bathu nkololo wa mambo unokolomoka.

²⁹Iye usingagwadze moyo tjinyolotjo una hwisiso hwulu, koga unotjimbidza kupkhwita moyo unopaphidza bulengwe.

³⁰Meya yakatebama inopa butjilo mu mbili, koga tjiba dzobodza mafupa.

³¹Iye unotshambilidza nshayi unotuka Mbumbi uwe, koga iye una ngoni ku bashayi unokudza Ndzimu.

³²Mbiimbi unowolashiwa ngekushinga bubi kukwe, koga nlulwami unowana dizhilo ngekushinga zwibuya kukwe.

³³Butjenjedu gogala mu nkumbulo we nthu una njele, koga mu mimoyo ye zwilengwe agutozibgwa.

³⁴Ndulamo inokudza ludzi, koga tjibi mabhatisashoni mu ludzi gupi kene gupi.

³⁵Nlanda unoshinga zwibuya akatjenjela unodika kuna mambo, koga usinga shinge nge butjenjedu unozwibengesa mambo.