Read Kalanga Makungulupeswa 15 Bible Online

Makungulupeswa 15 - Kalanga bible

Makungulupeswa 15

¹Dabilo yakatebama inodzikamisa bushongola, koga dama gukutu lodzonga bushongola.

²Lulimi gwe ntjenjedu godiya luzibo, koga milomo ye zwilengwe inoleba bulengwe.

³Mesho a Yahwe a pamwe ne pamwe, akalinga batjinyi ne balulwami.

⁴Lulimi lunyolo nti we butjilo, koga kusatambunuka ku muguli konyadza meya

⁵Tjilengwe tjolingila pasi ndayo dza tate batjo, koga una hanya nge kutjemegwa wakatjenjela.

⁶Mu ng'umba ye nlulwami kuna fumwa njinji, koga zwinowang'wa nge babi zwina mbatsha.

⁷Milomo ye batjenjedu inodzwala luzibo, koga mikumbulo ye zwilengwe ayizojalo.

⁸Zwibhayilo zwe babi zoshimisa kuna Yahwe, koga mitembezelo ye balulwani inobashathisa.

⁹Zila ye mbiimbi inoshimisa kuna Yahwe, koga banoda iye unotobela ndulamo.

¹⁰Shamu inogwadza inowoloba iye unobhuda mu zila, iye usingade tjemegwa unowofa.

¹¹Lufu ne Golomodzo zwi patjena mbeli kwa Yahwe, tisingalebe ngekwe kubona zose zwi mu mimoyo ye bathu.

¹²N'dadi aatoda kutjemegwa, aanganoshaka bhatsho ku batjenjedu.

¹³Moyo wakashatha unonakisa tjiso, koga moyo wakapuna unonyadza meya.

¹⁴Nkumbulo we unohwisisa unoshaka zibo, koga milomo ye zwilengwe inoja bulengwe.

¹⁵Mazhuba wose e wakatshambilidziwa mabi, koga una moyo ntjena unogala akashatha.

¹⁶Koyita kube ne kushomanana ngono nthu etja Yahwe, pana una fumwa hwulu inon'dziyidza.

¹⁷Koyita kuti nthu aje milibo nge ludo, pana kuja ng'ombe yakakodziwa pa zhele lubengo.

¹⁸Nthu una bushongola unomusa ngwa, koga moyonlefu unonyaladza zhoba.

¹⁹Zila ye simbe yakazwin'gwa nge mihwa, koga zila ye nlulwami imbuyanana yakashaladuka.

²⁰Mwana wakatjenjela unoshathisa tate babe, koga tjilengwe tjolingila mayi batjo pasi.

²¹Bulengwe goshathisa iye usina nkumbulo, koga nthu unohwisisa unoyenda mu zila yakatambunuka.

²²Pasina bukumbuludzi mano aatotubuka, koga pana bakumbuludzi banjinji mano anotubuka.

²³Nthu unoshathisiwa ngopa dabilo yakalulwama, ne dama ha lilebgwa nge tjibaka tjalo konaka seni!

²⁴Zila ye ntjenjedu inokwebela ku butjilo, kuti ndizo aleye ikumbu!

²⁵Yahwe banokolomola ng'umba ye unozwida, koga banotjengeta n'gathu we tjilikadzi.

²⁶Mikumbulo ye babi inoshimisa Yahwe, koga matama e babuyanana anobashathisa.

²⁷Iye unobe ali govu le fumwa unodziidza be nsha uwe, koga iye unobenga zwizwimba nlomo unowotjila.

²⁸Nkumbulo we wakalulwama unoalakana kuti ungadabila uyitini, koga nlomo we nthu mbi unoleba zwithu zwakabipa.

²⁹Yahwe bakule kwazo ne bakabipa, koga banohwa ntembezelo we balulwami.

³⁰Mesho akashatha anoshathisa moyo, ne thawu mabuya dzosimisa mafupa.

³¹Iye una zebe inoteedza kutjemela kunoyisa ku butjilo, unowogala pakati kwe batjenjedu.

³²Iye unolamba layiwa unozwilengudza, koga iye unotjemeleka unowana hwisiso.

³³Kutja Yahwe kodiya butjenjedu, ne kuzwiyisa pasi kozha kutangila kukudziwa.