Read Kalanga Makungulupeswa 16 Bible Online

Makungulupeswa 16 - Kalanga bible

Makungulupeswa 16

¹Ndongoloso inodwa mu moyo we nthu, koga dabilo ye lulimi inodwa kuna Yahwe.

²Zila dzose dze nthu imbuyanana mu mesho awe, koga Yahwe ndibo banoyela meya.

³Yisa tjimwe ne tjimwe tjaunoshinga kuna Yahwe, ndizo zose zowopunduka.

⁴Yahwe bakathama kuti tjimwe ne tjimwe tjibe ne nshingo watjo, ne babi bakathamigwa zhuba le zwakabipa.

⁵Mmwe ne mmwe una mazwikudzo unoshimisa kuna Yahwe, nge malebeswa, aangaletjedziwe asalobgwa shamu.

⁶Nlandu unozwimbiwa nge ngoni ne malebeswa, ne kutja Yahwe kothama nthu kuti aleye bubi.

⁷Ha zila dze nthu dzishathisa Yahwe, unothama kuti ne babengi babe bagale naye nge kunyalala.

⁸Koyita kube ne kushomana kuna ndulamo, pana kube ne fumwa nji kusina kutambunuka.

⁹Nkumbulo we nthu unoluka mano e zila iye, koga Yahwe ndibo banontendeka thambo dzaakafanila tola.

¹⁰Mambo unoleba zwadwa mu Ndzimu, nlomo uwe autoleba nge kusakatambunuka.

¹¹Zwiyelo ne zwilizanyo zwakatambunuka nge zwa Yahwe, mabgwe amu hwomo mishingo yabo.

¹²Kuthama tjakabipa koshimisa kuna bomambo, ngekuti tjigalo tje bumambo tjothumbidziwa nge ndulamo.

¹³Milomo yakatambunuka inoshathisa bomambo, kakale banoda iye unoleba zwakalulwama.

¹⁴Kugwadzamoyo kwa mambo ntumwa we lufu, ngono nthu wakatjenjela unogutebamisa.

¹⁵Mu kushatha kwe tjiso tja mambo kuna butjilo, ludo gugwe gonga gole le vula ye nyawuko.

¹⁶Kuwana butjenjedu kopinda kuwana golide, ne kuwana kuhwisisa kopinda kuwana siliva.

¹⁷Zila ye bakatambunuka inoleya mbipo, iye unolondolodza zila iye unotjengeta butjilo gugwe.

¹⁸Kuzwida kotangila kukolomoka, ne meya ye kuzwikudza inotangila kuwila pasi.

¹⁹Koyita kuzwiyisa pasi mu meya kulizana ne bashayi pana kukobana zwakatapiwa ne banozwikudza.

²⁰Iye una njele nge dama unowobhudilila, iye unogalabgwe Yahwe una kushatha.

²¹Una moyo wakatjenjela unodang'wa una hwisiso, ne ndebeleko mbuya inokulumbidza kudiyika.

²²Butjenjedu nsenya we butjilo kuna unago, koga bulengwe i shamu inoloba zwilengwe.

²³Nkumbulo we ntjenjedu unodiya nlomo uwe, upaphidza bunyambi gwe ndebo mu milomo iye.

²⁴Matama anozipa anonga mape e nyutji, anozipisa meya ne kumusa mbili.

²⁵Kuna zila inolingika yakalulwama ku nthu, koga bhelelo layo ino yesa ku lufu.

²⁶Zhala ye nshingi ino nshingila; nlomo uwe unonkulumbidza.

²⁷Nthu usina nshingo uno lukila bamwe zwakabipa, ne ndebo iye inonga moto unong'ora.

²⁸Nthu usi iye unogwisanya, ne nnyeyi uno thubukanya bazwalani.

²⁹Nthu unomanikidza zwithu unokwekweredza mbakidzani naye, e nkwebela kuthama zwisi izo.

³⁰Nthu uno vuna zhisho uno luka bupitipiti, iye unomuma nlomo unoti kusi lebgwe bubi gwaka etikala.

³¹Nsholo ntjena tjiala tjinokudzika, unowanika nge zila ye bululwami.

³²Iye una moyonlefu unopinda una simba, na iye unozwibhata unopinda uno tapa ntuthu.

³³Unga posa zo madaiza, koga Yahwe ndiye unotola thambo ye zwinowoyitikala.