Read Kalanga Makungulupeswa 17 Bible Online

Makungulupeswa 17 - Kalanga bible

Makungulupeswa 17

¹Koyita kuja ikwamu tje tjiwunga tjakawomelela pana ng'umba izhele zojiwa koga kugwiwa.

²Nlanda unoshinga ne butjenjedu unowobusa nkololo unoshinga zwinobhatisa shoni, kakale unowobe ne gobe le thaka se mmwe we bakololo.

³Bhisilo ngele siliva ne vutho ngeye golide, ngono Yahwe banolika mimoyo.

⁴Nthu unoshinga zwakabipa unoteedza milomo mibiibi, ne n'nyepi unoteyedza kululimi gwakaleleka.

⁵Iye unoseka nshayi unotuka Ndzimu uwe; na iye unodadila bashayi unotuka mbumbi uwe.

⁶Zwizekugwana tjiala tje kwegulu, ne gudzo le bakololo ndi botate babo.

⁷Bunyambi gwe ndebo agutofanila tjilengwe, koga seleba manyephwa kusingafanile nlauli.

⁸Tjizwimbanlomo tjonga bgwe lakanaka le masalamusi mu mesho e unolikoba, pamwe ne pamwe paanotendebukila unobhudilila.

⁹Nthu unozwiyibhatigwa mmwe unoshaka ludo, koga iye unomusa ndebo unopaladza bazwalani.

¹⁰Kutjemegwa kongina mu nthu unohwisisa, kupinda shamu dzili zana mu tjilengwe.

¹¹Nthu mbi tjaanoshaka koga bupanduki, ndizo unowotumigwa ntumwa una moyo nkukutu.

¹²Koyita kuti nthu ashangane ne bhira latolegwa bana, pana kushangana ne tjilengwe mu bulengwe gwatjo.

¹³Ha nthu e bgwiliza bubi nge bubuya, bubi agutowosiya nsha uwe.

¹⁴Kutangisa kwe kukwebakwebana konga wazhulila vula ye damu, ndizo misa kukwebakwebana kusathu kukatangisa.

¹⁵Iye unobona mbi akatambunuka ebe e bona nlandu nlulwami, bose banofanana nge kushimisa Yahwe.

¹⁶Kobhatshani wali kuti tjilengwe tjibhate mari nge luboko tjitenga butjenjedu, koga tjisina nkumbulo?

¹⁷Nzwalani unoda muzwibaka zose, ne nkololo wa tate wakazwaligwa nsi usakanaka.

¹⁸Nthu usina nkumbulo unozwisunga nge kutuna, eti unowolipila mbakidzani naye.

¹⁹Unoda tjinya unoda kukwebakwebana, iye unothama nkoba uwe eumilidzila pezhugwi unoshaka golomodzo.

²⁰Nthu una meya mbi aatobhudilila, ne una lulimi gusakalulwama unowila mu mbatsha.

²¹Nkololo we tjilengwe unozhisa shungu kuna tate babe, tate be tjilengwe abana kushatha.

²²Moyo wakashatha nti unopodza, koga moyo wakapuna unotema mafupa.

²³Nthu mbiimbi unoamutjila tjizwimba nlomo, kupeyamisa tjakatambunuka.

²⁴Nlume una kuhwisisa unozwilingisanya ne butjenjedu, koga mesho e tjilengwe aku phelelo dze shango.

²⁵Nkololo we tjilengwe unolonga tate babe shungu, ne kuhwisa zogwadza mayi bakazwala.

²⁶Kulipisa nlulwani akuzolulwama; kuloba makombgwa akuzolulwama.

²⁷Unoshalula matama una luzibo, ne wakatebamisa meya nthu unohwisisa.

²⁸Naitjo tjilengwe tjinozwinyalalila tjotogwa se ntjenjedu, ha emuma nlomo uwe unotogwa se wakatjenjela.