Read Kalanga Makungulupeswa 18 Bible Online

Makungulupeswa 18 - Kalanga bible

Makungulupeswa 18

¹Iye unozwidusa mu bamwe unoshaka madzetelo, kuti ashinge tjaanoda.

²Tjilengwe atjina hanya nge kuhwisisa, koga tjoshaka kuleba mazwiwo atjo.

³Ha bubi guzha, kulingigwa pasi naikobo kozha, kusalumbidziwa kozha kang'ompela ne kulengudziwa,

⁴Matama e nlomo we nthu i dziba lakangina, nsenya we butjenjedu lukobana gunowunga.

⁵Akuzo naka kumila nthu mbiimbi, kene kulambila nlulwami tjakatambunuka.

⁶Nlomo we tjilengwe unozhisa kukwebakwebana, ne kulebanya kukwe kodana kulobgwa.

⁷Lebanya kwe tjilengwe kotjipaladza, ne nlomo watjo i dati ku tjili.

⁸Matama e nnyeyi anonga zojiwa zwinozipa; anongina tjose tjamukati kwe nthu.

⁹Iye unabusimbe mu nshingo uwe, nnung'una we unokolomodza.

¹⁰Zina la Yahwe i thungamakole yakasima, nlulwami unotizhila kuili ngono wakabakililika.

¹¹Fumwa ye nfumi nzi uwe nkulu wakasima, se guma gulu linombakilila.

¹²Moyo we nthu unozwikudza ha asathu kawa, koga kuzwiyisa pasi kozha mbeli kwe gudzo.

¹³Ha nthu edabila asathu ahwa tjinolebgwa, bulengwe gugwe ne mabhatisashoni.

¹⁴Meya ye nthu inodzikitadzila kugwala kukwe, koga meya yakapuna ingatubugwa ndiyani?

¹⁵Nkumbulo wakatjenjela unowana luzibo, ne zebe ye ntjenjedu inoshaka luzibo.

¹⁶Tjipo tje nthu tjonzhulila bugalo, tjikansa pa bakulukulu.

¹⁷Unotanga kuwala ndebeleko iye unonga wakalulwama, kuswikila mmwe ezha embuzwisisa.

¹⁸Hakata dzopedza zhoba, dzikapedza ndebeleko pakati kwe mikwita inobe igwisana.

¹⁹Mwana wa tate wagwadza moyo unonga nzi nkulu wakasima, koga kukakabadzana kwabo kobathubukanya zwakasima.

²⁰Nthu unogutshiwa nge ntjelo we nlomo uwe, waanodzwala nge nlomo uwe.

²¹Lufu ne butjilo zwimu simba le lulimi, ndizo wali banoguda banowowana mbhailo wago.

²²Iye wawana nkadzi wawana tjithu tjakanaka, kakale unowana ludo gwa Yahwe.

²³Nshayi unokumbila eteta eamba, koga mfumi unon'dabila nge bushongola.

²⁴Nthu una bazwalani banjinji unopambuka mu zila, koga kuna nzwalani upejo kunopinda kwe mwana wa tate be nthu.