Read Kalanga Makungulupeswa 19 Bible Online

Makungulupeswa 19 - Kalanga bible

Makungulupeswa 19

¹Nshayi unotjilila mu malebeswa unoyita pa nthu unolebela ntome ngono ali tjilengwe.

²Akuzonaka kuti nthu ashaye luzibo, ne nthu unoyenda eyendisa unoleya zila.

³Ha bulengwe gwe nthu gu tjinya zila iye, moyo uwe unogwadzila Yahwe.

⁴Fumwa inozhisa bazwalani batshwa banjinji, koga nshayi unosiyiwa nge nzwalani.

⁵Ntendeki we manyepkhwa aatowoletjiwa asalobgwa shamu, ne unoleba manyepkhwa aatowoletjedziwa.

⁶Banjinji banozwizwadzanya ne nthu una mamo, kakale mmwe ne mmwe nzwalani we nthu unopa zwipo.

⁷Nshayi unobengiwa ne bana ba tate babe bose, ngono bazwalani babe ibo banowoyendila kule naye kungapani! Unodzobalebesa, koga abatoshako hwa.

⁸Iye unowana butjenjedu unozwida, iye unobhata hwisiso unowodwililambeli.

⁹Ntendeki we manyepkhwa aatowoletjiwa asalogwa shamu, ne unoleba manyepkhwa unowoloba.

¹⁰Akutofanila kuti tjilengwe tjitjilile mu ipepkhwe, koga se nlanda aangabe she we bakololo ba mambo.

¹¹Nkumbulo wakalulwama unothama nthu kasigwadze moyo tjinyolotjo, ngono gudzo laanalo loyita kuti asibe ne hanya ne jinyo.

¹²Kugwadzamoyo kwa mambo konga tjibombo tje shumba, koga ludo gugwe gonga khawa mu bushwa.

¹³Tjilengwe tje mwana tjo lengudza tate batjo, ne nkadzi unoda zhoba unonga vula ye midumbi.

¹⁴Dzing'umba ne fumwa ithaka inodwa kuna botate, koga nkadzi wakatjenjela unodwa kuna Yahwe.

¹⁵Busimbe golonga nthu mu hwope hwulu, ne simbe inowofa nge zhala.

¹⁶Iye unolondolodza nlayo unolondolodza butjilo gugwe, iye unolingila dama pasi unowofa.

¹⁷Iye una buthu ku bashayi unobigisa kuna Yahwe, ngobe unonlipila nshingo uwe wakanaka.

¹⁸Laya mwana uwo kutjina kugalabgwe, usilonge luboko mu lufu gugwe.

¹⁹Nthu una moywana unowolipila jinyo lile, ngoti ha unsunungula unowobgwilulula kakale.

²⁰Teedza gumbuludzo uamutjile zwidiyo, kuti ndizo kubupelo ube wakatjenjela.

²¹Nkumbulo we nthu unoluka maano manjinji, koga kuda kwa Yahwe ndiko kunowoshingikala.

²²Tjinoshakika mu nthu hwugalikabgwe, ne nshayi unopinda nyepi.

²³Kutja Yahwe kokwebela ku butjilo, na iye unago ugedzikane, aanga hwigwe nge tjimwe tjakabipa.

²⁴Simbe inolonga luboko gwayo mu ndilo, kakale ikakongwa ku gubgwiliza ku nlomo.

²⁵Loba ndadi, ndizo usinamano unowozwidiya butjenjedu; tjemela nthu una kuhwisisa, unowowana butjenjedu.

²⁶Iye una phipiti na tate babe ebe etata mmeyabe munzi unobhatisa shoni kunogwadza.

²⁷Nkololo wangu ha uletja kuteedza ndayo, unobe e fupatila matama e luzibo.

²⁸Ntendeki usina nshingo unodadila kutambunuka, ne nlomo mbiimbi unomidza mbipo.

²⁹Kusumikilisiwa kwakalindila badadi, ne shamu ye ikamba yakalindila zwilengwe.