Read Kalanga Makungulupeswa 2 Bible Online

Makungulupeswa 2 - Kalanga bible

Makungulupeswa 2

¹Nkololo wangu, ha uamutjila matama angu, ne kubiganya milayo yangu mukuli,

²uteya zebe iyo kuteedza butjenjedu, ne kulonga meya mu nyama kuhwisisa,

³nge lebeswa, ha ulilila kube ne ndingisiso umilidzila pezhugwi hwi lilo udana hwisiso,

⁴ha uishaka se siliva, uivima se fumwa yakasumbikala,

⁵ndiko kwaunowohwisisa kutja Yahwe ne kuwana luzibo gwe Ndzimu.

⁶Ngoti Yahwe banopa butjenjedu, kudwa mu nlomo wabo kodwa luzibo ne hwisiso,

⁷banobigila butjenjedu balulwami, ndibo tjivikili tja ibabo bana ntutshi,

⁸ne kulinda zila dze kutambunuka betjengeta zila dze balulwami babo.

⁹Ipapo unowohwisisa ndulamo ne kutambunuka ne kusashalaula, idzo zila dzose dzakanaka,

¹⁰ngoti butjenjedu gowozha mu moyo uwo, ne luzibo gowobe shatho mu meya iyo,

¹¹njalakang'wa dzowokulinda, kuhwisisa kowokutjengeta,

¹²zowokutjidza mu zila dze mbipo, kudwa mu ndebo dze bathu dzakaleleka,

¹³banolasha zila dzakatambunuka kuyenda mu zila dze zhalima,

¹⁴banoshathila kushinga mbipo ne kuda kusatambunuka kwe bubi,

¹⁵bathu be zila dzakakombama, bakatjenjelela ntome mu zila dzabo.

¹⁶Unowotjidziwa kuleya nkadzi we fukula, ne mu lulimi gugwe gunotjebela,

¹⁷unofupatila nkwinya uwe we butjetjana gugwe ekangangwa tjidumano tjitje ne Ndzimu uwe,

¹⁸koga nsha uwe unolobesiwa nge lufu, ne zila dzidze meya dze zhalima,

¹⁹akuna unoyenda kunli unoshanduka kene kawana zila ye butjilo.

²⁰Ndizo unoyenda mu zila dze bathu bakalulwama, ukayenda mu zila dze bakatambunuka.

²¹Ngoti bakatambunuka banowogala mu shango, ne bathu bana ntutshi banowosala muili,

²²ngono babiibi banowodusiwa mu shango ne bana bupielele banowodzikunugwa muguli.